खोज

दाङ, १० भदौ ।

व्यावसायिक कृषकलाई अनुदानमा समेट्नुपर्ने एक कार्यक्रमका सहभागीले जोड दिएका छन् । भेटेरीनरी अस्पताल तथा पशु सेवा विज्ञ केन्द्र दाङकोे आयोजनामा भएको आब २०८०÷०८१ को वार्षिक कार्यक्रमको सार्बजनिकीकरण कार्यक्रमका सहभागीले यस्तो धारणा राखेका हुन् ।

बबई गाउँपालिकाका प्रमुख प्रमोद बस्नेतले स्थानीय तहको समन्वयमा कार्यक्रम गर्नुपर्ने बताए । उनले गौशालामा रहेका पशुलाई लम्पी स्किनको खोपको व्यवस्था गर्नुपर्ने र वास्तविक किसानलाई प्रोत्साहन गर्नका लागि कार्यक्रम गर्नुपर्ने बताए । ‘भनसुन र पहुँचका आधारमा अनुदान दिनु हुदैन, फिल्डमा पुगेर अनुगमन गरेर मात्रै काम गर्नुपर्छ,’ उनले भने । अनुदानका कार्यक्रम गर्दा स्थानीय तहसंग समन्वय गरेर मात्र काम गर्नु पर्ने बताए । सहायक प्रमुख जिल्ला अधिकारी साबित्रा पुनले विनियोजित वजेट असारे बिकाशका रुपमा मात्र प्रयोग गर्न नहुने सल्लाह दिइन् । लक्षित वर्गका लागि आएको वजेट उनीहरुको लागि खर्च गर्नुपर्ने बताइन् ।

जिल्ला समन्वय समितिका प्रमुख नित्यानन्द शर्माले भेटेरीनरी अस्पताल तथा पशु सेवा विज्ञ केन्द्रले दिने अनुदानले किसानलाई उत्पादनमा प्रोत्साहन गर्ने खालका कार्यक्रम गर्नुपर्ने बताए । स्थानीय उत्पादनलाई प्रोत्साहन गरेर सबै पालिकालाई आत्मनिर्भर गर्नु पर्ने बताए । उनले भने, किसानमुखी कार्यक्रमले मात्रै किसानको उत्पादनलाई प्रोत्साहन हुन्छ, वास्तविक किसानले व्यवसाय अगाडि बढाउन अनुदानको आवश्यकता हुन्छ । अनुदानको सही सदुपयोग हुने गरेर काम गर्न आग्रह गरे ।

भेटेरीनरी अस्पताल तथा पशु सेवा विज्ञ केन्द्रका निमित्त कार्यालय प्रमुख सुदाम भट्टले आर्थिक बर्ष २०८०र०८१ को बार्षिक कार्यक्रम प्रस्तुत गरेका थिए ।

भेटेरीनरी अस्पताल तथा पशु सेवा विज्ञ केन्द्रका योजना प्रमुख कृष्ण न्यौपानेले आर्थिक वर्ष २०८०÷०८१मा व्यावसायीक पशुपालन उत्पादन वृद्धि पारिवारिक पोषण, रोजगारी र समृद्धि कार्यक्रमको बारेमा जानकारी गराएका थिए । मत्य बिकाश अधिकृत प्रेम चौधरीको स्वागत मन्तव्यबाट सुरु भएको कार्यक्रमको सहजीकरण प्रशासन शाखा प्रमुख शेरबहादुर केसीले गरेका थिए ।