खोज

पूर्वी रोल्पाको सुलिचौर वजारमा टाँस गरिएका निर्वाचन सामाग्री अझै हटाइएको छैन । निर्वाचन भएको एक वर्ष पुरा भईसक्दा समेत निर्वाचन सामाग्री नहटाउदा सुलिचौर वजारको सौन्दर्यता नै विग्रिएको छ ।
सुलिचौर वस पार्क नजिक वीच सडकमा नेपाली कांग्रेसका उम्मेदरको प्रचारका लागि स्थानीय निर्वाचनमा टाँस गरेको प्रचार सामाग्री अझै झुण्डी राखेको छ । यसैगरि प्रतिनिधि सभा एवम प्रदेश सभा निर्वाचनका वाम गठवन्धनका साझा उम्मेदवारको प्रचारका लागि टाँस गरेका सामाग्री समेत अझै हटाइएका छैनन । सार्वजनिक स्थल र व्यक्तिगत घर तथा सडक छेउछाउमा निर्वाचनको पक्ष विपक्षमा लेखिएका नारा र प्रचार सामाग्री लामो समय वित्दा समेत हटाउने तर्फ कसैको ध्यान नगएको स्थानीयहरुले गुनासो गरेका छन ।
अघिल्लो वर्ष आषाढ १४ गते स्थानीय तहको निर्वाचना सम्पन्न भएको थियो । सो निर्वाचन सम्पन्न भएको एक वर्ष पुरा भईसकेको छ । यसैगरि मंसिरमा प्रतिनिधि सभा र प्रदेश सभा निर्वाचन सम्पन्न भएको थियो । दुवै निर्वाचनमा प्रयोग भएका ति प्रचार सामाग्री हटाउने तर्फ संवन्धित पक्षको ध्यान नजाँदा स्थानीयहरुले असन्तुष्टी जनाएका छन । वजारको सौन्दर्यता समेत हस हुने गरि टाँस गरिएका त्यस्ता सामाग्री हटाउने पहल नगरिनु दुखद रहेको स्थानीय रिमवहादुर विष्टले प्रतिकृया दिए । निर्वाचन सम्पन्न भए संगै प्रचार सामाग्रीको पनि औचित्य समाप्त भएपनि ती सामाग्री हटाउने तर्फ कसैको ध्यान गएन विष्टले भने । राजनैतिक दल र तिनका कार्यकर्तामा जिम्मेवारीवोध नभएका कारण लामो समय वितिसक्दा समेत सडकमा प्रचार सामाग्री टंगिरहेका छन विष्टले भने । निर्वाचनमा राजनैतिक दल र स्वतन्त्र उम्मेदवारहरुले फ्लेक्स प्रीन्टको अत्यधिक प्रयोग गर्नुका साथै भित्ते लेखन समेत गरेका कारण वजारको सौन्दर्यता नै विग्रिएको छ विष्टले भने ।
निर्वाचन सम्पन्न भए लगत्तै त्यस्ता सामाग्री अनिवार्य रुपमा हटाउन संवन्धित निकायवाट कडा निर्देशन आए स्वतः त्यस्ता सामाग्री हट्ने वडा सदस्य तेजकुमारी विष्टले वताईन । निर्वाचन पश्चात जित्नेहरुमा जितको उन्माद र हार्नेहरुमा जिम्मेवारी वोध नहुनुका कारण वजार क्षेत्रमा यस्तो अवस्था देखिने गरेको विष्टको भनाई छ । एक महिना भित्र हटाउनु पर्ने त्यस्ता सामाग्री अझै मुख्य वजार क्षेत्रमा देखिनु सकारात्मक पक्ष नभएको विष्टले वताईन । स्थानीय सरकारहरु सरसफाई, स्वच्छता र वातारण सुधारमा समेत सकारात्मक ढंगले लागि रहेको हुदा त्यस तर्फ पनि ध्यान जानेमा आफु आशावादी रहेको विष्टले प्रतिकृया दिईन । वजार क्षेत्रवाट त्यस्ता सामाग्री तत्काल हटाइने सुनिल स्मृती गाउँपालिका ३ का वडाध्यक्ष गंजवहादुर क्षेत्रीले वताए । वजार सौन्दर्यताका लागी आफुहरुले विभिन्न प्रयास गरिरहेको वताउदै त्यस्ता सामाग्री भए तत्काल हटाउछौ क्षेत्रीले भने । निर्वाचन सम्पन्न हुने वित्तिकै हटाउने पर्ने त्यस्ता सामाग्री अहिले सम्म झुण्डीरहनु सोभनिय नभएको क्षेत्रीको भनाई छ ।
निर्वाचनमा प्रयोग गरिएका प्रचार सामाग्री निर्वाचन सकिए लगत्तै हटाउनु पर्ने प्रावधान रहेको निर्वाचन कार्यालयले जनाएको छ । टाँस गर्ने व्यक्ति, पार्टी वा संस्थाले नै हटाउनु पर्ने भएकाले त्यस्ता सामाग्री नहटाएको भए अविलम्व हटाउनु पर्ने कार्यालयले वताएको छ ।