खोज

चन्द्रौटा (कपिलवस्तु), २ साउन ।
आँप भन्ने बित्तिकै आम नागरिकले बिशेषगरी कपिवलस्तु जिल्लालाई सझिन्छन् । जहाँ उत्पादन भएका आँप अधिकाशं शहर बजारमा पुग्ने गरेको छ । तर आँप उत्पादनको थलो रहेको स्थानमा नै मूल्य बढेपछि उपभोक्ता मारमा परेका छन् ।

कपिलवस्तुमा गत वर्षभन्दा यस वर्ष आँपको उत्पादन घटेको छ । विगतको वर्षभन्दा यस बर्ष १० प्रतिशतले उत्पादन कम भएपछि आँपको मूल्यमा बृद्धि भएको हो । जिल्ला कृषि ज्ञान केन्द्र कपिलवस्तुका प्रमुख डा. रविन्द्रनाथ चौबेका अनुसार आँपको मञ्जरी विगतका वर्षभन्दा बढी फुलेपनि मधुवा कीराका कारण फल लाग्न नसकेको थिएन् । विगत भन्दा यस बर्ष धेरै क्षेत्रफलमा आँप खेती गरेको भएपनि उत्पादन भने कम भएको छ ।

यस वर्ष कपिलवस्तुमा १ हजार ४ सय ५० हेक्टर क्षेत्रफलमा १२ हजार टन आँप उत्पादन भएको ज्ञान केन्द्र कपिलवस्तुका प्रमुख चौबले बताए । उनले गत वर्ष १ हजार ४ सय २० हेक्टरमा १३ हजार टनभन्दा बढी आँप उत्पादन भएको उनको भनाई छ । समयमा पानी नपर्दा साँेचे जस्तो आँप उत्पादन नभएको उनले जनाए ।

स्थानीय कृषक राहुल पाण्डेले हावाहुरी तथा कीराका कारणले आँपको दाना हुन नसक्दा सोचेजस्तो उत्पादन नभएका बताए । यो वर्ष आँप जोगाउन धेरै मुस्किल परेको थियो उनले भने : ‘कहिले कीरा लागी हैरान पारेको छ, कहिले पानी नपरेर समस्या भयो’, पाण्डेले भने, ‘धेरैपटक विषादी छर्केर केही भएपनि बचाएका हौँ, नत्र सबै सखाप हुन्थ्यो ।’

कपिलवस्तु लगायत तराईका जिल्लामा आँप उत्पादन गरिन्छ । बजारमा विगतमा ६० रुपैयाँमा पाइने आँप यतिबेला प्रतिकिलो १ सय पुगेको छ । जिल्लाको शिवराज, कृष्णनगर, यशोधरा, महाराजगञ्ज, मायादेवी, विजयनगर लगायत स्थानमा आँप बगैंचा रहेका छन् ।

शिवराज नगरपालिकाका कृषि विकास अधिकृत ताराचन्द चौधरीले नगरभित्र ७५ हेक्टरमा व्यावसायिक रूपमा आँप उत्पादन भएको बताउँछन् । यस वर्षमा ५ हजार ५ सय क्विन्टल आँप उत्पादन भएको उनले बताए । विगतभन्दा उत्पादन घटेकाले मूल्य बढेको बताउँदै ‘बगैंचा बाहिरका व्यवसायीले ठेक्कामा खरिद गर्ने भएकाले मूल्य बढेको छ’ : चौधरीले भने ।