खोज

कर्णाली प्रदेशमा नेपाली कांग्रेसका सांसद जीवनबहादुर शाही मुख्यमन्त्री बन्ने भएका छन् ।

मुख्यमन्त्री महेन्द्रबहादुर शाहीले वैशाखमा विश्वासको मत लिंदा सत्तारुढ गठबन्धनबीच भएको सहमति अनुसार कांग्रेस संसदीय दलका नेता शाही नयाँ मुख्यमन्त्री बन्न लागेका हुन् । सरकारको नेतृत्वको गरिरहेको नेकपा (माओवादी केन्द्र) का एक नेताका अनुसार, केही सातामै शाहीको नेतृत्वमा सरकार गठन हुने भएको छ ।

गत वैशाखमै माओवादी र काग्रेसबीच कांग्रेसलाई नेतृत्व हस्तान्तरण गर्ने सहमति बनेको थियो ।

नेकपा (एमाले)सँगको सहमतिमा ३ फागुन २०७४ मा शाही मुख्यमन्त्री बनेका थिए । ३ जेठ २०७५ मा एमाले र माओवादीबीच एकीकरण भएर नेकपा बनेसँगै उनी बहुमत प्राप्त संसदीय दलको नेताका रूपमा मुख्यमन्त्री यथावत थिए । तर, गत २३ फागुनमा सर्वोच्च अदालतको फैसलाले नेकपाको विघटन भएसँगै एमाले र माओवादी ब्युँतिएका थिए। त्यसपछि ३ चैत २०७७ मा एमालेले मुख्यमन्त्री शाही नेतृत्वको सरकारलाई दिएको समर्थन फिर्ता लिएको थियो ।

त्यसको एक महीनापछि ३ वैशाखमा कांग्रेससँगै एमालेका चार सांसदले मुख्यमन्त्री शाहीलाई विश्वासको मत दिएका थिए । फ्लोर क्रस गर्ने चार सांसदलाई एमालेले कारबाही गरिसकेको छ ।

त्यति वेला ४० सदस्यीय प्रदेश सभामा एमालेका २० सांसद थिए । एमाले विना सरकार गठन गर्न नसकिने अवस्था थियो । एमाले भने एक सांसदको समर्थन पाए सरकार गठन गर्नसक्ने अवस्थामा थियो । एक सांसद रहेको राप्रपाले एमालेलाई सहयोग गर्ने संकेत दिएको थियो ।

४० सदस्यीय कर्णाली प्रदेश सभामा अहिले ३५ सांसद छन् । एमालेका चार सांसद पदमुक्त भएका छन् । त्यस्तै, नेकपा विघटन हुँदा एमालेतिर गएका एक सांसदलाई माओवादीले पनि कारबाही गरेको छ ।

माओवादी र कांग्रेस मिलेर सरकार गठन हुने भए पनि एमालेबाट विभाजन भएर बनेको एकीकृत समाजवादी प्रदेश सरकारमा सहभागी हुने भएको छ । केन्द्रमा रहेको गठबन्धन अनुसार नै प्रदेशमा पनि गठबन्धनको सरकार बन्न लागेको हो ।