खोज

कोभिडको संक्रमणका बेला रगतको अभावमा नागरिकको अकालमै ज्यान नदिन कपिलवस्तुको चन्द्रौटामा रक्तदान गरिएको छ ।

सशस्त्र प्रहरी बल, नेपाल नंं. ५ बिन्ध्याबासिनी बाहिनी मुख्यालय चन्द्रौटा कपिलवस्तुमा आयोजित रक्तदान कार्यक्रममा ५१ युनिट रगत संकलन भएको छ । बुटवलमा रगतको कमि छैन भन्ने मूल नारा सहित नेपाल स्वयंसेवी रक्तदाता समाज रोटरी रोट्रयाक्ट र नं. ५ विन्ध्याबासिनी बाहिनीको आयोजनामा रक्तदान कार्यक्रम गरिएको हो । रक्तदान कार्यक्रममा बुटवल रेडक्रस सोसाइटीको प्राविधिक सहयोग रहेको थियो ।

कार्यक्रमका बीच सशस्त्र प्रहरी बल नेपाल नं. ५ बिन्ध्यावासिनी बाहिनी मुख्यालयका प्रमुख सशस्त्र प्रहरी नायब महानिरीक्षक बाहिनीपति किशोर प्रधानले सशस्त्र प्रहरी देशका नागरिकको शान्ति सुरक्षासँगै विभिन्न विपतका बेला नागरिकको उद्धारमा काम गर्दै आएको जानकारी गराए । महामारी नियन्त्रणमा प्रदेशका ठूला नाकाहरुमा सिमा सुरक्षासगै कोरोना नियन्त्रणका लागि नागरिकलाई सचेत गराउने काममा अग्रपंक्तिमा रहेर काम गर्दै आइरहेको बताए । प्रदेशको सुनौली, कृष्णनगर जमुना नाकाबाट प्रबेश गर्ने नेपाली दाजुभाइलाई सुरक्षित नेपाल प्रबेश गराउन, स्वास्थ्य सुरक्षा सम्बन्धी चेतना दिन सशस्त्र प्रहरीलाई तालिम दिएर खटाइएको सशस्त्र प्रहरी नायब महानिरीक्षक प्रधानले बताए । रगतको कमिले यो कोरोना महामारीमा कसैले पनि ज्यान गुमाउन नपरोस् भन्दै सशस्त्र प्रहरीले रक्तदान गरेको उनले जनाए ।

कार्यक्रममा नेपाल स्वयंसेवी रक्तदाता समाज रुपन्देहीका अध्यक्ष कृष्ण चौहानले अहिले कोभिड १९ को महामारीको बेला कसैले पनि रगतको अभावले ज्यान गुमाउन नपरोस् भन्दै यस किसिमको अभियान संचालन गरेको बताए ।

रगतको अभाव हुन नदिन कोभिड सँगै अन्य किसिमका विरामीलाई रगत उपलब्ध गराउन रक्तदान कार्यक्रम गरिएको रोटरी रोट्रयाक्ट कोभिड १९ सहजीकरणका संयोजक सुरज खरेलको भनाई छ । कार्यक्रममा चौहान र खरेलले सशस्त्र प्रहरीलाई मायाको चिनो समेत प्रदान गरेका थिए ।