खोज

यौन व्यवसायसंग जोेडिएको आफ्नो समुदायको बिगतलाई घोतल्ने काम गरेर समाजका ऐना मानिने साहित्यकार र चलचित्रकर्मीले नै पीडा दिने काम गरेको बादी समुदायका अगुवाले दुःखेसो पोखेका छन् । यथार्थ भन्दा फरक र तथ्यलाई बिगार्दै चलचित्र, उपन्यास र कथाहरु प्रकाशन गरेर बिगतलाई बिर्सिएर आत्मसम्मानका साथ बाँच्न खोजेको नयाँ पुस्तालाई तनाव दिइरहेको राष्ट्रिय वादी परिषदका अध्यक्ष केशव नेपाली बादीले बताए ।
‘ एउटा कालखण्डमा राज्य सन्चालकबाट जर्बजस्ती हाम्रा चेलीहरुलाई बेश्याबृतिमा लगाइयो । हाम्रा पुर्खाले व्यहोर्नुपरेको त्यो कालो समय अहिले छैन । हामी बिर्सिन चाहान्छौं । तर नभएका कुराहरु समेत बाहिर ल्याउने काम गरेर हामीलाई पीडा दिने काम भइरहेको छ , अहिले । ’— केशवले भने । अहिले बिभिन्न चलचित्र हलमा चलेको चलचित्र पण्डित बाजेको लौरीमा बिगतमा पनि आफ्ना पुर्खाले नगरेको काम प्रस्तुत गरेर होच्याउने काम भएको उनले बताए ।
चलचित्रमा बिबाहित बादी युवतीले परपुरुषसंग सम्बन्ध नराख्ने गरेको भएपनि चलचित्रमा श्रीमानलाई ग्राहक खोजिदिने गरेको देखाइएको अर्का वादी समुदायको अधिकारका लागि काम गर्ने अगुवा सुकलाल नेपाली वादीले बताए । त्यस्ता कुराहरु कहिल्यै नभएको अध्ययनले पनि देखाएको सुकलालले जानकारी दिए । ‘ भएका कुराहरु सार्वजनिक गर्दा हामीलाई आपत्ती हुने कुरा भएन तर यहाँ त नभएको कुरा ल्याउन थालियो । सायद यिनीहरुलाई जे भने पनि जे गरेपनि हुन्छ भन्ने परेको जस्तो लागिरहेको छ ।’ सुकलालले भने ।
यसअघि सार्वजनिक भएका नथिया, ऐलानी जस्ता साहित्यीक कृतीमा पनि नभएका कुरा लेखिएको बादी अगुवाको भनाई छ । उनीहरुले यस्ता प्रबृतिका बिरुद्धमा कानुनी उपचार खोजिने पनि जनाएका छन् ।