खोज

कोरोना संक्रमित बढ्दै जाँदा दाङका स्थानिय तहहरुले अक्सिजन सहितको (आइसोलेसन) बेड निर्माण गर्न थालेका छन् । दिनदिनै संक्रमितको संख्या बढ्दै गएको र आईसियु बेड नभएका कारण मृत्यु हुनेको संख्यामा पनि बृद्धि भएकोले अक्सिजन सहितको आईशोलेसन वेड निर्माण गर्न लागेका हुन् ।

जिल्लाका १० वटा पालिका मध्ये कुनैमा आइसोलेसन बेड निर्माणको कार्य थालिएको छ भने कुनैमा निर्माण भइसकेको जिल्ला स्वास्थ्य कार्यालय दाङले जनाएको छ । जसकालागि संघीय सरकारले प्रत्येक पालिकालाई १० लाखका दरले बजेट समेत पठाएको छ । जिल्ला स्वास्थ्य कार्यालय दाङका प्रमुख अंगदबहादुर शाहीले दिएको जानकारी अनुसार दंगीशरणमा अक्सिजन सहितको ५ बेडको आइसोलेसन निर्माण भइसकेको छ भने सञ्चालनमा आउन अझै बाँकी छ । दाङमा अहिले प्रदेश सरकारले स्थापना गरेको कोरोना बिशेष अस्पताल बेलझुण्डीमा ५ बेडको मात्रै आइसियु रहेको छ ।

तुलसीपुर उपमहानगरपालिकाले राप्ति प्रादेशिक अस्पताललाई आईसीयु वेड सञ्चालनका लागी सहयोग गरीरहेको जनाएको छ । कोरोना संक्रमित बढ्दै जाँदा कोरोना अस्पतालमा रेहको आइसीयु बेड अपुग हुनसक्ने भन्दै राप्ती प्रादेशिक अस्पतालमा ५ बडेको आइसीयु निर्माण थालेको तुलसीपुर उपमहानगरका कोरोना फोकल पर्सन विमल केसीले जानकारी दिए । अस्पतालमा आईसियुको लागी समान आईसकेको छ भने जडान गर्न वाँकी छ । “आईसियु वेड सञ्चालन गरेर मात्र हुदैन, व्यवस्थापन गर्न चुनौति छ” फोकल पर्सन केसीले भने । कोरोना संक्रमणलाई व्यवस्थान गर्नेहो भने लकडाउन नै उपयुक्त विकल्प रहेको उनको भनाई छ ।

जिल्लामा अहिले ५ सय ६९ जना सकृय संक्रमितहरु रहेका छन् भने १४ जनाको मृत्यु भैसकेको जिल्ला आपतकालिन कार्य सञ्चालन केन्द्रले जनाएको छ । जिल्लाका दुई ठुला उपमहानगरपालिकाले विगतमा बनाएका आईशोलेसन सेन्टरहरु पनि बन्द गरेका छन् । तुलसीपुर उपमहानगरपालिकाका कोरोना फोकल पर्सन विमल केसीका अनुसार लकडाउन खुलेर विद्यालयहरु सञ्चालनमा आएका कारण आईशोलेसन सेन्टरहरु बन्द भएका हुन् । “आईसियुमा राख्नुपर्ने विरामीलाई कोरोना विशेष अस्पताल बेलझुण्डी पठाउने गरीएको छ भने अन्यलाई होमआईशोलेसन बस्न भनेका छौ” केसीले भने । विद्यालयहरु सञ्चालनमा आउनेभएपछि बनेका आईशोलेसन बन्द गराएपनि २ महिनाकालागी घोराही उपमहानगरपालिकाले भाडामा आईशोलेसन सेन्टर सञ्चालनमा ल्याएको थियो । उक्त आईशोलेसन सेन्टर पनि गत साउन महिनावाट बन्द भएको छ । कोरोना संक्रमितहरु बढेपनि लक्षण नदेखिएकाहरुलाई होम आईशोलेसनमा बस्न लगाएको नगरप्रमुख नरुलाल चौधरीले जानकारी दिए । “लक्षण देखिएर समस्यामा भएका संक्रमितलाई बेलझुण्डी पठाउने गरेका छौ भने अन्यलाई होम आईशोलेसनमै बस्न सुझाएका छौ” चौधरीले भने ।

यता दाङका प्रमुख जिल्ला अधिकारी जयनाराण आचार्यले जिल्लामा कोरोना नियन्त्रणका लागि थप कदमहरु चालिएको बताएका छन् । “कोरोना नियन्त्रणका लागि जिल्लाका सरकारवाला निकायसँग छलफल पनि भएको छ, थप आइसियु बेड निर्माणदेखि जनचेतना जगाउने कार्यक्रम गरिने छ” उनले भने । समुदायमा संक्रमण थप नफैलियोस् भन्ने उद्देश्यले संक्रमितले आइसोलेसनमा रहंदा अपनाउनु पर्ने स्वास्थ्यका मापदण्डका वारेमा जनचेतना जगाउने, थप परिक्षण बढाउन र रिपोटिंङ गर्ने, उपचारकालागि आवश्यक आइसीयु बेडसँगै भेन्टिलेटर निर्माण गर्ने तयारी थालिएको आचार्यले बताए ।