खोज

प्रदेश ५ का बिभिन्न जिल्लाका प्रहरी युनिटमा अग्रपंतीमा खटिने प्रहरीका लागी स्वास्थ्य सुरक्षा सामाग्री हस्तान्तरण गरिएको छ । अग्रपंतीमा खटिएर काम गर्ने प्रहरीहरुमा कोरोना भाईरस (कोभिड १९) को संक्रमण बढन थाले पछि कपिलवस्तु सहितका बिभिन्न जिल्लाका प्रहरी युनिटमा स्वास्थ्य सुरक्षा सामाग्री हस्तान्तरण गरिएको हो ।

डिएफआईडीको सहयोगमा मधेस मानव अधिकार गृह (माहुरी होम) ले सञ्चालन गरेको सहज परियोजनाको कार्य क्षेत्र अन्तर्गतका ७ जिल्लाका २२ पालिकाका प्रहरी युनिटलाई केन्द्रित गरि स्वास्थ्य सुरक्षा सामाग्री उपलब्ध गराईएको हो । मंगलबार जिल्ला प्रहरी कार्यालय कपिलवस्तुको परिसरमा माहुरी होमका अध्यक्ष रवि ठाकुर, महासचिव माया ज्ञवाली र सहज परियोजना संयोजक बिना चौधरी लगायतले करिब ५३ हजार मुल्य बढिको स्वास्थ्य सुरक्षा सामाग्रीहरु प्रहरी उपरिक्षक नवराज अधिकारीलाई हस्तान्तरण गरे । हस्तान्तरण गरिएका सामाग्रीमा पिपीई सेट, स्यानेटाईजर, हेण्ड वास, थर्मल गन, ग्लोब्स र माक्स लगायतका सामाग्री थिए । प्राप्त सामाग्रीले हरेक समय नागरिकको शान्ति सुरक्षाका लागी अग्रपंतीमा खटिने प्रहरीको स्वास्थ्य सुरक्षाको प्रत्याभुती गर्न सहयोग पुग्ने प्रहरी उपरिक्षक नवराज अधिकारीले बिस्वास व्यक्त गरे । “कोरोना संक्रमणको जोखिम बिच अग्रभागमा खटिएका प्रहरीको स्वास्थ्य सुरक्षाको प्रत्याभुती गराउन सहयोग पुग्ने छ । ” उपरिक्षक अधिकारीले भने ।

परियोजना अन्र्तगत प्रदेश प्रहरी कार्यालय सगै कपिलवस्तु, रुपन्देही, नवलपरासी पश्चिम, दागं, प्यूठान, रोल्पा र बाँके जिल्लाका जिल्ला प्रहरी कार्यालयदेखि प्रहरी चौकी सम्मका ४८ प्रहरी युनिटमा करिब १० लाख ५० हजार मुल्य बढिका स्वास्थ्य सुरक्षा सामाग्री प्रदान गरिएको सहज परियोजनाकी संयोजक बिना चौधरीले जनाईन । अग्रपंतीमा खटिएर काम गर्ने सुरक्षाकर्मी कोरोना संक्रमणको बढि जोखिममा रहेकाले सुरक्षाकर्मीका लागी स्वास्थ्य सुरक्षा सामाग्री प्रदान गरिएका माहुरी होमका अध्यक्ष रवि ठाकुरले बताए । “स्वास्थ्य सुरक्षा सामाग्री बितरणले अग्रपंतीमा खटिएका प्रहरीको स्वास्थ्य सुरक्षाको अवस्था बलियो भई मनोवल थप बढने छ ।”ठाकुरले भने । जिल्लाभर हालसम्म १ हजार १ सय ६७ जनामा कोरोना संक्रमण देखिएकोमा ५७ जना सुरक्षाकर्मीसमेत संक्रमित भईसकेका छन ।