खोज

बिभिन्न निकायहरुको मिलमतोमा सार्वजनिक जग्गा ब्यक्तिको नाममा दर्ता भएको २९ बर्ष पछि रहस्य खुलेको छ । सार्वजनिक जग्गा भएको कारण स्थानियहरुले उद्यानको रुपमा प्रयोग गर्दै आएको जग्गा ब्यक्तिको नाममा रहेको पाईए पछि स्थानिय आक्रोशित भएका छन ।
रुपन्देही सदरमुकाम भैरहवा संगै जोडिएर रहेको मायादेवी गाउपालिकाको १६ कठ्ठा ३ धुर जग्गा नवलपरासी जिल्ला  बर्दघाट नगरपालिकाका सुरेश अर्यालले आफ्नो नाममा दर्ता गराएको रहस्य खुलेको छ । साविक हाटी बनगाई गाविस वडा नम्बर ५क को कित्ता नम्बर ३५९ र ३६० को गरि १६ कठ्ठा ३ धुर जग्गा निज अर्यालले २०४६ सालमा नै आफ्नो नाममा दर्ता गराएका छन ।
करोडौ मूल्य पर्ने उक्त जग्गा अर्याललाई २०४६ सालमा लुम्बिनी अञ्चल क्षेत्रिय वासोवास कार्यालयले सुकुम्वासी भन्दै उपलब्ध गराएको छ । सुकुम्वासी भनिएका सुरेश अर्यालले भने उक्त जग्गा कहिले पनि भोग गरेनन् । अहिले पनि उक्त जग्गामा स्थानियहरु घर टहरा बनाएर बसोबास गरि रहेका छन । २०४६ सालमा अर्यालको नाममा जग्गा आए पनि के कति प्रमाणले उनको नाममा आएको हो त्यो केही पनि खुलेको छैन । उनको नाममा जग्गाधनि श्रेस्ता मात्र भएको र जग्गा आएको देखिने अन्य कुनै पनि मिसिद नभएको मालपोत कार्यालय रुपन्देहीका प्रमुख मालपोतथ अधिकृत शिव प्रसाद रेग्मीले बताए । प्रमुख मालपोत अधिकृत रेग्मीले अहिले जग्गाधनि अर्यालले उक्त जग्गा पनि ५० लाखमा धितो राखेको बताए ।
यता स्थानियहरुले उक्त जग्गा जग्गाधनि सुरेश अर्यालले किर्ते गरि आफ्ना नाममा गराएको दावी गरेका छन । “कुनै प्रमाण नै पेश नगरी सो जग्गा सिधै अर्यालको नाममा गएको छ ।” स्थानिय शंकर ज्ञवालीले भने । जग्गाधनिको नाममा जग्गा हस्तान्तरण हुदा उनको उमेर १२ बर्षको मात्र देखिन्छ । फिल्डबुक उतारमा अहिले पनि उक्त जग्गा पर्ति जग्गा भएको उल्लेख छ । “यति मात्र हैन नवलपरासी माकरको मान्छेलाई कसरी यहाको जग्गा सुकुम्वासी भनेर दिन मिल्छ ?” ज्ञवालीले भने ।
यता यस बिषयमा मायादेवी गाउपालिका वडा नम्बर ८ को भूमिका पनि शंकास्पदख देखिएको स्थानियहरुको दावी छ । अहिलेका वडाध्यक्ष चोक बहादुर थापा दलिय प्रतिनिधि रहेको अवश्थामै २०६४ साल तिर उक्त सार्वजनिक जग्गाबाट बाटो लैजाने भन्दै ४ वटा उद्योगहरुबाट ५० हजारका दरले तत्कालीन गाविसले कर उठाउने निर्णय भएको थियो । उनै वडा अध्यक्ष चोक बहादुर थापाले अहिले उक्त सार्वजनिक जग्गाको कर बापत रकम पनि उठाई रहेको र सोही जग्गालाई निजि भन्दै बिभिन्न सिफारीस समेत दिएको स्थानियहरुको आरोप रहेको छ ।
मायादेवी गाउपालिकाको वडा नम्बर ८ को कार्यालयले २०७४ भदौ १९ गते सोही जग्गाको जग्गाधनि प्रमाण पूर्जाको प्रतिलिपि र २०७४ असोज २ गते चारकिल्ला सिफारीस गरि दिएको छ । सोही प्रमाणहरुको आधारमा नै जग्गाधनि अर्यालले उक्त जग्गा धितो राखी कर्जा लिएका हुन ।

सार्वजनिक जग्गाको संरक्षण गर्ने निकाय स्थानिय तहकै संलग्नतामा ब्यक्तिको नाममा गएको स्थानिहरुको आरोप रहेको छ । यस बिषयमा मायादेवी गाउपालिका वडा नम्बर ८ का वडा अध्यक्ष चोक बहादुर थापाले उक्त जग्गा सार्वजनिक नै भएको आफुलाई जानकारी भएको बताए । उनले झुक्किएर चारकिल्ला सिफारीस दिएको बताए । अहिले गाउपालिकाको निर्देशनमा मालपोत कार्यालय रुपन्देहीलाई उक्त जग्गा कुनै प्रकारले कारोबार गर्न नमिल्ने गरि रोक्का राख्न अनुरोध गरिएको थापाले बताए ।