खोज

दाङमा लकडाउनको समयमा २९ जना जेल चलान भएका छन् । लकडाउनको अवधिमा दाङ देउखुरी जिल्ला अदालतमा दर्ता भएका ६३ वटा मुद्दामा २९ जना जेल चलान भएको दाङ देउखुरी जिल्ला अदालतका न्यायाधीश रितेन्द्र थापाले जानकारी दिएका छन् ।

अदालतमा सबैभन्दा धेरै ज्यान सम्बन्धी कसुरका १७ वटा मुद्दा परेका छन् । त्यस्तै करणी सम्बन्धी १४, सवारी ज्यानका १०, वन सम्बन्धी ९, बालविवाह कसुर ३, लागूऔषध, गौवध र ठगी सम्बन्धी २/२ वटा र नागरिकता सम्वन्धी, अपमानजनक व्यवहार, गर्भपतन सम्वन्धी र हातहतियार खरखजना मुद्दा १/१ गरी ६३ वटा मुद्दाहरु दर्ता भएको दाङ देउखुरी जिल्ला अदालतका न्यायाधीश थापाले जानकारी दिए । ४९ जना धरौटी राखेर तारिखमा छुटेका छन् भने १२ जना साधारण तारिखमा छुटेको न्यायाधीश थापाले बताए ।

थापाका अनुसार २१ जना फरार रहेका छन् भने ४ जनालाई अभिभावकको जिम्मा लगाइएको छ । ६३ मुद्दामध्ये ६१ वटा मुद्दाहरू फैसला भएका छन् । जसमध्ये २९ वटा मुद्दाहरूमा भिडियो कन्फ्रेन्सिङ्ग प्रयोग गरिएको थियो । त्यसैगरी अदालतले बन्दाबन्दीको समयमा ८३ वटा मुद्दामा म्याद थप, ५१ मुद्दामा पक्राउ अनुमति र १ सय ११ मुद्दामा जरुरी पक्राउ पूर्जीका अनुमति दिएको समेत जानकारी दिए । यसैबीच जिल्ला अदालतले यस आर्थिक बर्षको हालसम्म एक हजार बढी मुद्दा फच्र्यौट गरेको छ । यस आर्थिक बर्षको हालसम्म १ हजार १ सय ७१ मुद्दा फच्र्यौट गरेको जिल्ला न्यायाधीश थापाले जानकारी दिए । फच्र्यौट भएका मध्ये ५ सय ८८ मुद्दाहरू जिम्मेवारी सरी आएका र ५ सय ८३ मुद्दाहरू यसैबर्ष दर्ता भएका हुन् ।

न्यायाधीश थापाका अनुसार अदालतमा गतबर्ष जिम्मेवारी सरेर आएका १ हजार २ र नयाँ दर्ता भएका १ हजार ५ सय ३६ गरी २ हजार ६ सय १ मुद्दा रहेका छन् । २ हजार १३ फच्र्योट गर्ने लक्ष्य रहे पनि बन्दाबन्दीका कारण लक्ष्य भन्दा आधा कम १ हजार १ सय ७१ मुद्दा फच्र्याैट गरेको थापाले जानकारी दिए । उनका अनुसार अब अदालतमा दर्ता भएका १ हजार ४ सय ४७ मुद्दाहरु बाँकी रहेका छन् । अदालतले १ हजार ८ सय ५० मुद्दाहरु फच्र्यौट गर्ने लक्ष्य लिए पनि बन्दाबन्दीका कारण लक्ष्य पूरा गर्न नसकेको थापाले बताए । अदालतमा यो बर्ष १ हजार ८ सय ६३ मुद्दाहरु दर्ताहरु हुने अनुमान गरिए पनि जेठको १८ गतेसम्म १ हजार ५ सय ३६ मुद्दाहरु मात्रै दर्ता भएका छन् । त्यसैगरी अदालतमा बाल इजलासका ३७ वटा मुद्दाहरु फर्यौट भएका छन् । जिम्मेवारी सरेर आएका ३३ र नयाँ दर्ता भएका ३९ गरी जम्मा ७२ मुद्दा मध्ये ३७ वटा फच्र्यौट भएको न्यायाधीश थापाले जानकारी दिए । बाल इजलासका ३५ मुद्दाहरु बाँकी रहेका छन् । जसमध्ये जिम्मेवारी सरी आएका २५ र नयाँ दर्ता भएका १२ वटा मुद्दाहरु यो बर्ष फैसला भएको उनले जानकारी दिए ।

अदालतले १ सय ८ वटा थनुवा मुद्दा फच्र्यौट गरेको छ । जिम्मेवारी सरेर आएका १ सय ८ र नयाँ १ सय १२ गरी अदालतमा दर्ता भएका २ सय २० मुद्दामध्ये अदालतले यो बर्ष १ सय ८ वटा मुद्दाहरु फच्र्यौट गरेको हो । १ सय १८ मुद्दाहरु बाँकी रहेका छन् । ९७ जना थुनुवा मध्ये ८ जना महिला र २ जना बालबालिकाहरु रहेका न्यायाधीस थापाले जानकारी दिएका छन् । यसबर्ष ५३ वटा मुद्दामा मेलमिलाप भएको छ । अदालतले मेलमिलापमा पठाएका ३ सय ७६ मुद्दामध्ये ५३ मुद्दाहरुमा मिलाप भएको न्यायाधीश थापाले जानकारी दिए । जसमध्ये २ सय ६३ मुद्दाहरुमा मेलमिलाप हुन बाँकी रहेको समेत उनले बताए । मेलमिलापमा पढाएका मध्ये १९ वटा मुद्दाहरु गत बर्षबाट जिम्मेवारी सरेर आएका थिए ।