खोज

बुटवल,२८ चैत । नेपाल राष्ट्र बैंकका गभर्नर महाप्रसाद अधिकारीले नेपालमा बैंकहरुको अवस्था सुरक्षित रहेको बताएका छन् । नेपाल राष्ट्र बैंकले चालु आर्थिक वर्ष २०७९–८० को ८ महिनाको वर्तमान आर्थिक तथा वित्तीय स्थितिसम्बन्धी तथ्यांक सार्वजनिक गर्न आयोजित कार्यक्रममा मंगलबार उनले यस्तो बताएका हुन् ।
समग्रमा बैंकहरूको तथ्यांकहरू पनि बलिया र अवस्था सुरक्षित रहेकाले सानोतिनो धक्काले जाखिम नआउने उनले भने ।
गभर्नर अधिकारीले विदेशी विनियम सञ्चिति सुविधाजनक अवस्थममा रहेको बताए । फागुनदेखि कर्जाको ब्याजदर स्थिर भएपनि बेसरेट घट्दो दरमा रहेको समेत उनले जानकारी दिए । विदेशी विनियम सञ्चिति सुविधाजनक अवस्थमामा पुगेको र मुद्रास्फीति घट्दो अवस्थामा रहेको समेत उनले बताए ।

सूचक सुधार हुँदा पनि ब्याजदर केही माथि भएको भए पनि फागुनदेखि बेसरेट घट्दो दरमा पुगेको उनको भनाइ छ । पूँजी पर्याप्तता नियामकीय व्यवस्था भन्दा माथि रहेको र निष्कृय कर्जा केही बढेपनि धेरै माथि नपुगेको उनले बताए । अर्थतन्त्रको शिथिलता आगामी दिनमा सुधार हुने उनको भनाइ छ । बैकर र व्यवसायीले आगामी दिनमा उच्च मनोबलका साथ काम गर्ने उनको विश्वास छ ।

मासिक १ खर्ब रुपैयाँ रेमिट्यान्स भित्रियो
नेपाल राष्ट्र बैंकले आज जारी गरेको चालु आर्थिक वर्षको ८ महिनाको तथ्यांकअनुसार पछिल्लो केही महिनादेखि मासिक १ खर्ब रुपैयाँ रेमिट्यान्स भित्रिएको देखिएको छ।

फागुन महिनामा मात्रै १ खर्ब ४ अर्ब रुपैयाँ रेमिट्यान्स भित्रिएको केन्द्रीय बैंकले जानकारी दिएको छ ।

आज नेपाल राष्ट्र बैंकले चालू आर्थिक वर्षको ८ महिनामा देशको वर्तमान आर्थिक तथा वित्तीय स्थिति सार्वजनिक गरेको हो। यस्तो तथ्यांकअनुसार पछिल्लो ८ महिनामा भने ८ खर्ब ९३ अर्ब रुपैयाँ रेमिट्यान्स भित्रिएको छ ।

यो आर्थिक वर्ष २०७९-८० को सोही अवधिको तुलनामा २५.३ प्रतिशतले बढी हो।

रेमिट्यान्स आय औसतमै मासिक एक अर्ब रुपैयाँ पुगेको हो । तथ्यांकअनुसार औसत मासिक ९९६ अर्ब रुपैयाँ रेमिट्यान्स यो वर्षको पछिल्लो ८ महिनामा भित्रिएको देखिएको छ।