खोज

गुल्मी, ८ वैशाख ।

गुल्मी जिल्लाको रुरुक्षेत्र गाउँपालिका तीन थोर्गाका ५६ वर्षीय चोलनाथ ज्ञवालीले गुड र खुदो बेचेरै वार्षिक २२ लाखको कारोवार गर्दै आएका छन् । सोही पेसाको आम्दानीबाटै उनले छोराछोरीलाई स्नातकोत्तरसम्म पढाउन सफल भएका छन् ।

पहिले बुवाले गर्दै आएको पुख्र्यौली पेशालाई विगत आठ वर्षदेखि आफूले आधुनिकीकरण गर्दै आएको उनको भनाइ छ । ८५ रोपनी क्षेत्रफलमा उँखु लगाएका उनले गुड र खुदो बेचेरै चार छोरा छोरीलाई शिक्षा दिक्षा दिंदै आएको बताए ।

परिवारमा श्रीमतीसहित छोराछोरीको ठूलो साथ रहेकाले आफू यहाँसम्म आउन सकेको उनले बताए । जेठीसहित दुई छोरी र छोराले काठमाडौँबाट (एमबीएसमा) स्नातकोत्तर पास गरेका छन् भने कान्छी छोरीले अहिले स्नातक पूरा गरेकी छिन् ।

अहिले छोरा र जेठीछोरीले काठमाडौँ र बुटवलमा जागिर गर्न लागेकाले आफूलाई थप टेवा पुगेको ज्ञवालीले बताए । छोराछोरीलाई यहाँसम्म ल्याउनका लागि यहीँ खुदो र गुड नै मुख्य आधार भएको उनको भनाइ छ । थोर्गेली चोलानाथ खुदो तथा गुण उद्योग दर्ता गरी वार्षिक २२ लाख बराबरको कारोवार गर्दै आएकाले सबै खर्च कटाएर सात लाख बढी बचत गर्दै आएको उनले बताए ।

उद्योगबाट सादा गुडलाई प्रतिकिलो दुई सय ७५, मसलावालालाई तीन सय ५० देखि पाँच सयसम्ममा बिक्री हुने गरेको छ । मसलावाला गुडमा काजु र कुराउनी मात्रा अनुसार मूल्य हुने गर्दछ । यस्तै खुदोलाई २२० रुपियाँ प्रति लिटरमा बिक्री गर्दै आएको उद्योगका श्रमिक टोपबहादुर पौडेलले बताए ।

१८ जनालाई रोजगारी

उद्योगमा छ जनाले वर्षैभरी र १२ जनालाई सिजनमा रोजगारी प्रदान गर्दै आएको ज्ञवालीले बताएका छन् । उत्पादित गुण र खुदोका लागि बजारको कुनै समस्या नरहेको उनले बताए । उद्योगबाटै उत्पादित बस्तु बिक्री हुने गरेकाले आफू सन्तुष्ट रहेको ज्ञवालीको भनाइ छ । तम्घासबाट बुटवल जाने गाडी र बुटवलबाट तम्घास आउने गाडीहरुले रोकेरै उद्योगबाट खुदो र गुँड लिएर जाने गरेको उनले बताए ।