खोज

बुटवल, ७ बैशाख । राजनीतिक रुपमा एकताबद्ध हुन नसक्दा स्याङ्जा विकासमा पछि परेको वालिङमा आयोजित एक कार्यक्रममा बोल्ने वक्ताहरुले दाबी गरेका छन । स्याङ्जाबाट प्रकाशित अकला आवाज साप्ताहिकले शनिबार स्याङ्जाको वालिङमा गरेको स्याङ्जाको समग्र विकास र समृद्धिमा मिडियाको भुमिका बिषयक अन्तरक्रिया कार्यक्रममा बोल्ने वक्ताहरूले अनावश्यक राजनीतिक मतभेद र तिक्तताले विकासको लय अगाडि नबढेको जिकिर गरेका हुन ।
कार्यक्रममा वालिङ नगरपालिकाका संस्थापक मेयर तथा गण्डकी प्रदेश सभा सदस्य भोजराज अर्यालले गण्डकी प्रदेशमा स्याङ्जाको उपस्थिति कमजोर बनेको बताउदै पर्वतको तुलनामा समेत स्याङ्जा कमजोर रहेको टिप्पणी गरे । पर्वतका गाउँ गाउँमा सडक व्यवस्थित भएपनि स्याङ्जाले त्यो नसकेको स्विकारे ।

कार्यक्रममा बोल्ने अधिंकास वक्ताहरुले स्याङ्जाको सिद्धार्थ राजमार्ग स्तरोन्नति नहुनु सबैभन्दा ठुलो दुर्भाग्य भएको बताए । ०६४ यता विकासमा निकै पछाडि रहेका जिल्लाहरु ०८२ सम्म आइपुग्दा निकै अगाडि फड्को मारेपनि स्याङ्जाले अपेक्षित विकासको लय समात्न नसकेको टिप्पणी गरेका थिए ।
वक्ताहरुले स्याङ्जाको बसाइँसराइ डरलाग्दो ढंगले बढेको भन्दै स्याङ्जामा शिक्षा र स्वास्थ्य व्यवस्थित गर्न नसके केही बर्षमा स्याङ्जाका गाउँहरु रित्ता हुने जिकिर गरे । कालिगण्डकी करिडोरले स्याङ्जा किन समेट्न सकेन गम्भीर समिक्षा जरुरी रहेको समेत बताएका थिए ।

शिक्षा क्षेत्रमा राम्रो क्याम्पस सञ्चालन गर्न नसक्नु र स्वास्थ्यमा समेत व्यवस्थित अस्पताल नहुदा स्याङ्जाको भबिस्य अझै कमजोर बनेको टिप्पणी गरिएको थियोे । स्याङ्जाका पर्यटकीय ठाउँहरुलाई समेत व्यवस्थित प्रचारप्रसार गर्न नसक्दा पर्यटन क्षेत्र समेत अपेक्षित नभएको टिप्पणी थियोे ।

कार्यक्रमको अगुवाइ पत्रिकाका अध्यक्ष तथा सम्पादक प्रकाश डुम्रेले समुदायमा समाज अनावश्यक नकारात्मकता तर्फ उन्मुख भएको भन्दै सभ्य र सकारात्मक समाज निर्माणमा समेत लाग्नुपर्ने बताए ।वक्ताहरूले यो तहका बहस,छलफल तथा अन्तरक्रिया वालिङको हकमा १०÷१५ बर्षपछि पहिलोपटक भएको भन्दै अकला आवाजलाई निरन्तरता दिन अपिल गरेका थिए । कार्यक्रममा स्याङ्जाको समग्र विकास,समृद्धि र सुशासनका बारेमा गहिरो विमर्श गरिएको थियोे ।