खोज

बुटवल, ७ बैशाख । बुटवलमा जारी यू–१४ टि ट्वान्टी क्रिकेट प्रतियोगिताको उपाधिका लागि देवदह क्रिकेट युनिट र आयोजक वेष्ट्रन क्रिकेट क्लब भिड्ने भएका छन । समुह ए मा आफनो ५ वटै खेलमा जितसहित कुल १० अंक र ४.६१० नेट रनरेटका साथ देवदह फाईनलमा स्थान बनाएको हो । यसैगरि समुह बि मा ५ खेलमध्ये ४ खेलमा जित र एक खेलमा हारसहित कुल ८ अंक र २.५२२ नेट रनरेटका साथ आयोजक फाईनलमा स्थान बनाउन सफल भयो ।

समुह बि मा रुपन्देही क्रिकेट एकेडेमी पनि समान खेलमा जित र ८ अंक भएपनि नेट रनरेट कम हुदा बाहिरियो । बुटवल उपमहानगरपालिकाको आर्थिक सहयोग तथा वेष्ट्रन क्रिकेट क्लब बुटवलको आयोजनामा जारी प्रतियोगिताको फाईनल सोमबार बिहान ९ बजेदेखि हुने भएको छ ।

फाईनल खेलसंगै प्रतियोगिताको विजेता, उपविजेता तथा उत्कृष्ट खेलाडीहरुलाई पुरस्कार वितरण गरिने क्लबका अध्यक्ष भुवन पाण्डेले बताए । युवा खेलाडीहरुलाई प्लेटफर्म दिने गरि १४ वर्ष मुनिका खेलाडीहरुको १२ वटा टिमलाई दुई समुह विभाजन गरी राउण्ड रोविनका आधारमा खेलाईएको र समूहको शिर्ष दुई टोली फाईनलमा पुगेको उनले बताए ।

प्रतियोगितामा विजेता टिमले नगद ४१ हजार ट्रफी, मेडल र प्रमाणपत्र तथा उपविजेता टिमले २१ हजार नगद राशी प्राप्त गर्ने उनले बताए । यसैगरी विधागत तर्फ उत्कृष्ट व्याट्सम्यानलाई २ हजार ५ सय, सर्वोत्कृष्ट खेलाडीलाई ५ हजार नगद राशीले सम्मान गरिने उनले बताए ।