खोज

प्रदेश मातहतमा सरकारी कार्यालय खुलेको महिनौं वितेपनि मन्त्रालयको नीति, कार्यक्रम तथा बजेटको अख्तियारी नआउँदा जिल्लामा रहेका कार्यालय काम बिहिन भएका छन् ।
प्रदेश मन्त्रालयले बजेट विनियोजन गरेपनि अख्तियारी नदिँदा चालु आर्थिक बर्षको पहिलो चौमासिक बितिसक्दा समेत कुनै पनि कार्यालयले काम गर्न सकेका छैनन् ।
गत साउन १ गतेदेखि जिल्ला स्तरका सबै विषयगत कार्यालयहरू स्थानीय तहमा गएपछि जिल्लामा रहेका विषयगत कार्यालयहरू प्रदेश कार्यालयका रूपमा खुल्दै गएका छन् । दाङमा प्रदेश सरकार अन्तर्गत कृषि क्षेत्रका लागि कृषि ज्ञान केन्द्र दाङ, जिल्ला भेटेनरी अस्पताल तथा पशु ज्ञान केन्द्र, भौतिक पूर्वाधार अन्तर्गत पुल र सडकको काम गर्ने गरि पूर्वाधार विकास कार्यालय, खानेपानी तथा सरसफाई कार्यालय लगायतका कार्यालयहरू दाङमा स्थापना भएका छन् ।
तर मन्त्रालयको अख्तियारी नआउँदा कार्यालय स्थापना भएको लामो समय बितिसक्दा पनि प्रदेश सरकारले निकालेका सूचना स्थानीय तहसम्म पु¥याउने र सेवाग्राहीहरूलाई प्राविधिक सल्लाह दिने काम मात्र गर्दै आएका छन् । एकभन्दा बढी जिल्ला हेर्नेगरी स्थापना गरिएका कार्यालयहरूमा दरबन्दी अनुसारका कर्मचारीहरू समेत छैनन् ।
प्रदेश सरकारले समयमै अख्तियारी नपठाउँदा कर्मचारीहरूले गत साउन महिनादेखि तलब भत्ता समेत खान नपाएको कृषि ज्ञान केन्द्र दाङका कृषि प्रसार अधिकृत भरत पोख्रेलले बताए । ‘प्रदेश मन्त्रालयले अख्तियारी नपठाउँदा साउनदेखि कर्मचारीहरूले तलब भत्ता खान पाएका थिएनन्” कृषि प्रसार अधिकृत पोख्रेलले भने ।
अहिले कर्मचारीहरूलाई तलब भत्ता खानलाई केही दिन पहिले प्रदेश मन्त्रालयले अख्तियारी पठाएको उनले जानकारी दिए । अख्तियारी अनुसार कर्मचारीहरूले तलव खाने प्रक्रियामा रहेपनि अन्य कामको लागि मन्त्रालयले अख्तियारी नपठाएको उनले बताए ।
कार्यालयले प्रदेश सरकारले पठाएका सूचनाहरू स्थानीय तह तथा कृषि सहकारी र किसानहरूसम्म पु¥याउने तथा कार्यालयमा आउने किसानहरूलाई परामर्श दिने काम मात्र गर्ने गरेको बताए । उनका अनुसार यही महिना भित्रै प्रदेश सरकारले अख्तयारी पठाउने बताए । पोख्रेलका अनुसार कार्यालयमा १६ जनाको दरबन्दी रहेकोमा अहिले १४ जना कार्यरत छन् । तर जिल्ला पूर्वाधार विकाश कार्यालयमा भने कर्मचारीहरूको अभाव छ । मंसिर २ गतेदेखि सञ्चालनमा आएको कार्यालयमा १६ जनाको दरवन्दी रहेपनि अहिले कार्यालयमा ४ जना कर्मचारीहरू रहेको जिल्ला पूर्वाधार विकास कार्यालयका निमित्त प्रमुख बाशुदेव भण्डारीले जानकारी दिए ।
जिल्लामा कार्यालय ढिला स्थापना भएकाले अख्तियारी पनि आएको छैन, कार्यालयमा कर्मचारी नि नभएको र अख्तियारी पनि नआएकाले केही काम गर्न सकेका छैनौ निमित्त कार्यालय प्रमुख भण्डारीले भने । उनका अनुसार प्रदेश सरकारले कर्मचारी र कामका लागि अख्तियारी दिए कार्यालय कामको तयारीमा लाग्ने थियो । जिल्ला भेटेनरी अस्पताल तथा पशु सेवा विज्ञ केन्द्रले भने जिल्लामा सेवाग्राहीहरूलाई कार्यालयले सेवा दिने काम गरिरहेको कार्यालयले जनाएको छ ।
दरबन्दी अनुसार कार्यालयमा कर्मचारी नभएपनि जिल्लामा कार्यालय स्थापना भएदेखि नै कार्यालयमा आउने सेवाग्राहीहरूलाई भेटेनरी तथा पशु सेवा दिँदै आएको कार्यालय प्रमुख बेदबहादुर केसीले जानकारी दिए । ‘हामीले हेर्ने पशुहरूको स्वास्थ्य सम्बन्धी हो, त्यो काम अस्पतालवाट गरिरहेका छौ, केसीले भने । अन्य काम भर्खरै प्रदेश कार्यालयले अख्तियारी पठाएकाले अवका दिनहरूमा गर्ने तयारीमा लागेको उनको भनाई छ ।
प्रदेश मन्त्रालयले अख्तियार पठाएपनि प्रदेश कोष तथा लेखा नियन्त्रक कार्यालय जिल्ला कोष तथा लेखा नियन्त्रक कार्यालयलाई बजेट खर्चको स्वीकृति नदिएकाले अन्य काम गर्न नसकिएको कार्यालय प्रमुख केसीले बताए ।
अहिले जिल्लामा प्रदेश मातहतमा रहेका कार्यालयहरूले समयमै अख्तियारी नपाउँदा कुनै काम गर्न सकेका छैनन् । कार्यालयमा आउने सेवाग्राहीहरूलाई सेवा दिने बाहेक बजेट मन्त्रालयले सम्वन्धीत क्षेत्रमा छुट्टाएको बजेट खर्च गर्न समेत समस्या भएको अधिकारीले बताएका छन् ।