खोज

बुटवल उद्योग बाणिज्य संघले प्रदान गरेको सचिवालयमा स्थापना भएको प्रदेश नम्बर ५ को प्रदेश सभा सचिवालय स्थान अभावको कारण कार्यसम्पादनमा अप्ठ्यारो भएपछि बिस्तार गरेको छ । विगत १० महिनादेखि बुटवल उवासंघले उपलब्ध गराएको भवनबाट कार्यसम्पादन गर्दै आएकोमा अहिले थप ३ वटा संघ संस्थाले उपलब्ध गराएको भवनमा सचिवालयका विभिन्न शाखा, प्रदेश सभा प्रतिपक्ष दलको कार्यालय, संसदिय दलको नेताको सचिवालय सहित प्रदेशका विषयगत समितिका पदाधिकारीहरूको सचिवालय व्यवस्थापन गरिएको हो ।
नेपाल मानव धर्म सेवा समिति, पश्चिमाञ्चल पेट्रोलियम डिलर्स एशोसिएशन र बुटवल महिला जेसिजको भवनमा अहिले सजावटको कार्य भैरहेको छ भने कतिपयमा सजावटको कार्य सम्पन्न भैसकेको छ । प्रदेश सभा सचिवालयलाई पाँच बर्षको लागि ती सामाजिक संघ संस्थाले निःशुल्क रूपमा भवन उपलब्ध गराएका छन् ।
प्रदेश नम्बर ५, प्रदेश सभा सचिव दुर्लभ कुमार पुन मगरले भवनको अभावमा प्रदेश सभा अन्तर्गतका बिषयगत समिति, प्रदेश सभामा प्रतिनिधित्व गर्ने संसदीय दलका कार्यालय, क्यान्टिन, पुस्तकालय र सचिवालयका कर्मचारीका लागि कोठाको अभाव रहेकोमा अब त्यो समस्या केही हदसम्म टर्ने बताएका छन् ।

पेट्रोलियम डिलर्सको भवनमा सत्ता पक्ष दल नेपाल कम्युनिष्ट पार्टीको संसदीय दलको कार्यालय, महिला जेसिजको भवनमा प्रमुख प्रतिपक्ष दल नेपाली कांग्रेस संसदिय दलको कार्यालय सहित, संघिय समाजवादी फोरम, राष्ट्रिय जनाता पार्टी र राष्ट्रिय जनमोर्चा नेपालको संसदीय दलको कार्यालय रहने प्रदेश सभा सचिवालयले जनाएको छ । सोही भवनमा संवाद केन्द्र र पुस्तकालय रहेने छ । मानव धर्म सेवा समितिको भवनमा ६ वटा बिषयगत समितिका कार्यालयको लागि प्रयोगमा ल्याईने छ । यी भवन प्रयोगमा आउदा सचिवालय व्यवस्थापनमा सहज हुने प्रदेश सभा सचिवालयले जनाएको छ । सचिवालय रहेको कम्पाउण्ड भित्रको बुटवल उद्योग बाणिज्य संघको सभा हललाई प्रदेश सभा भवनको रूपमा प्रयोग हुदै आएको छ । सभाहललाई व्यवस्थित गर्न भौतिक पुर्वाधार बिकाश मन्त्रालय मार्फत डेकोरेसनको काम भईरहेकोे ईन्जिनियर राम आश्रय शाहले जानकारी दिए । प्रदेश ५को राजधानी कहा“ रहने भन्ने टुङ्गो नलाग्दा प्रदेशको मुख्यालय निमार्णमा पनि ढिलाई भइरहेको छ । जसको कारण प्रदेश अन्र्तगत रहने कार्यालय व्यवस्थापनमा चुनौति थपिएको छ 

दुर्लभ कुमार पुन

सचिव प्रदेश सभा सचिवालय प्रदेश नम्बर ५