खोज

प्रदेश नं. ५ का मुख्यमन्त्री शंकर पोख्रेलले दाङका खोलाहरूमा निर्माणाधीन अवस्थामा रहेको पुलहरूको बुधवार अनुगमन गरेका छन् । अनुगमनका क्रममा मुख्यमन्त्री पोख्रेलले ठेकेदारहरू कम्पनीहरूलाई तोकिएको समयमा काम पूरा गर्न निर्देशन समेत दिएका छन् ।
यदि समयमै काम पूरा नगरे कालो सूचीमा राखिने समेत मुख्यमन्त्री पोख्रेलले बताएका छन् ।
दाङको लमही देखी तुलसीपुर सम्मरहेका १० वटा खोलाहरूमा पुल निर्माणको काममा ढिलासुस्ती भएको गुनासो आएपछि मुख्यमन्त्री पोख्रेलले अनुगमन गरेका हुन् । खोलाहरूमा समयमै पुल निर्माण नहुँदा बर्षादको समयमा यातायात आवागमन अवरुद्धहुने तथा हिउँदे समयमा धुलोका कारण यात्रुहरूलाई निकै सास्ती हुने भन्दै मूख्यमन्त्री पोख्रेलले समयमै काम पूरा गर्न निर्देशन दिएका हुन् । बुधवार भएको अनुगमनका क्रममा प्रतिनिधिसभा सदस्य हिराचन्द्र केसी, नेकपाका सचेतक शान्ता चौधरी लगायतको सहभागिता रहेको छ । लमही–तुलसीपुर सडक खण्डका १० वटा खोलाहरूमा अहिले पुल निर्माण कार्य भईरहेको छ । तीन किलोमिटरको फरकमा रहेका खोलाले यात्रा निकै जोखिमपूर्ण हुने गरेको छ  । लमही तुलसीपुर खण्डको चौपट्टादेखि तुलसीपुरसम्म बबई, सिस्ने, कटुवा, सेवार, गुर्जे, हापुर, पत्रे, संक्राम, ग्वार र काला खोलाहरू रहेका छन् । यीमध्ये ५ वटा खोलाहरूमा पुल निर्माणको काम सुरु भए पनि गती भने सुस्त छ  । बबई, कटुवा, गुज्रे, पत्रे र संक्राममा पुल बनाउन थालेको लामो समय बित्यो तर ठेकेदार र सडक डिभिजन कार्यालय दाङको लापरबाहीका कारण काम अघि बढ्न सकेको छैन । अहिले पनि समयमै काम नभए आउने वर्षाद्मा सवारी आवागमन निकै कष्टकर हुने छ ।
पुल निर्माणको काम अन्य खोलामा केही हदसम्म भए पनि कटुवा र पत्रे खोलामा कुनै प्रगति हुन सकेको छैन । यी खोलाका पुलमा सबैभन्दा बढी लापरबाही भएको छ  । यि दुई खोलाहरूमा सबैभन्दा पहिले निर्माण थालिएको हो । पछि काम सुरु गरेका संक्राम, गुर्जे र बबईमा काम धेरै अघि बढ्दा पनि यहाँ कुनै प्रगति हुन सकेको छैन । यी खोलामा पुल निर्माण गर्ने ठेक्का लिएको शंकर माली कन्स्ट्रक्सनले काममा लापरबाही गरिरहेको छ  । शंकर मालीका प्रतिनिधि पदम शर्मा काममा गैरजिम्मेवार भएको भन्दै सबैतिरबाट आक्रोश व्यक्त भइरहेको छ ।
बबई र गुज्रे खोलाको ठेक्का अनक वज्रगुरु निर्माण सेवा र संक्राम खोलाको रौताहा कन्स्ट्रक्सनले लिएको छ । शंकरमाली भन्दा यी कम्पनीले केही प्रगति गरेका छन् । एउटै व्यवसायीले धेरै योजना लिने र समयमा काम नगर्ने समस्या बढदै गएको छ । तर ठेक्का लिएको ५ वर्षसम्मपनि काम सम्पन्न नगर्ने निर्माण कम्पनीलाई कारवाही गर्नुको साटो पटक पटक म्याद थप्दै प्रोत्साहन गर्ने काम सडक डिभिजन कार्यालयवाट हुदै आएको छ ।
उता शंकरमालीका साईट म्यानेजर पदम शर्माका अनुसार कटुवा खोलाको पुलको काम ८५ प्रतिशत सम्पन्न भैसकेको छ भने पत्रे खोलाको काममा ढिलाई हुनुमा सडक डिभिजनको लापरवाही भएको छ । पहिले बनाएको पुलको डिजाईन फेल भएकोले निर्माणमा ढिलाई भएको शर्माको भनाई छ । पत्रेखोलाको पुलको नयाँ डिजाईन अहिलेसम्म सडक डिभिजन कार्यालयले उपलब्ध नगराएकोले ढिलाई भएको उनको दाबी छ ।