खोज

खेतीयोग्य जमिनमा रेलवे लाईनको स्टेशन निर्माणका लागि माटो परिक्षण र सर्वेक्षण शुरु गरिएको भन्दै कपिलवस्तुको शिवराज नगरपालिका–३ मधवाका स्थानीयले अवरोध गरेका छन् ।
मेचीकाली रेलमार्ग परियोजना अन्तर्गत लमही बुटवल रेलमार्गको मधवामा राख्न थालिएको रेलवे स्टेशनको बिरोधमा स्थानीय उत्रिएका हुन् । सेयुन ईन ऐसोसियसन वीथ ईएमआरसी कन्सल्टेन्सीका प्राबिधिकले सो स्थानमा माटो परीक्षण गर्न खोज्दा बिगतमा वन क्षेत्रबाट निर्माण गरिने भनिएको रेल्वे लाईन र सो को स्टेशन आवास क्षेत्र र खेतीयोग्य जमिनमा परेको भन्दै स्थानीय बिरोधमा उत्रिएका हुन ।
पूर्व–पश्चिम रेलमार्गको बुटवल पश्चिमको चार प्याकेज मध्ये बुटवल लमहीखण्ड अन्तर्गत रेल्वे लाईनको माटो परिक्षण पश्चात स्टेशन निर्माणका लागि माटो परिक्षण शुरु गरिएको थियो । स्थानीयले स्टेशनका लागि केन्द्रबिन्दुबाट १ सय ५० मिटर र रेल्वे लाईनका लागि केन्द्रबिन्दुबाट २५/२५ मिटर जग्गा आवश्यक पर्ने जानकारी पाएसँगै आफुहरूलाई पूर्व जानकारी बिना सो कार्य अगाडी बढाईएको भन्दै बिरोधमा उत्रिएका हुन् ।
बिगतमा गाउँभन्दा उत्तरतर्फ रहेको वन क्षेत्र जोडेर रेलवेलाईन निर्माण हुने जानकारी पाएको भए पनि हाल बस्तीबाटै रेल्वे लाईन निर्माण हुने जानकारी पाएपछि आन्दोलनमा उत्रिएको स्थानिय कृष्ण थारुले बताए । “पहिले बनको छेउछाउबाट रेलवे बनाउने हल्ला थियो । तर अहिले एक्कासी बस्ती क्षेत्रमा आएर माटो परिक्षण गर्न थालिएछ । बस्तीमा रेल्वे लाईन र स्टेशन निर्माण भए हाम्रो बिचल्ली हुन्छ,” थारुले भने ।
आफुहरूले रेल्वे लाईनको माटो परिक्षण सम्पन्न गरि रेल्वे स्टेशनको सर्वेक्षण पश्चात माटो परिक्षण गर्ने क्रममा स्थानीयले अवरोध गरे पछि माटो परिक्षण कार्य रोकेको कन्सल्टेन्सीका साईड ईन्चार्ज तथा ल्याव टेक्निसियन शिवराम रिजालले जानकारी दिए । स्थानीयले बिरोध जनाए पछि सम्बन्धित स्थानीय तह सँग समन्वयमा निकास खोजिने उनले प्रतिक्रिया दिए । “गत बर्ष सर्वेक्षण र माटो परिक्षणका क्रममा कुनै समस्या आएको थिएन । तर यस बर्ष स्थानीयले बिरोध जनाएका छन् । स्थानीयतह र स्थानिय प्रशासनसँग समन्वय गरेर उपयुक्त निकाश निकाल्छौ,” रिजालले भने ।