खोज

तिलोत्तमा, २३ फागुन । रुपन्देहीको तिलोत्तमा–१० स्थित उद्यमशील टोल विकास संस्थाले फरक ढंगले होली मनाएको छ । होली पूर्णिमाको दिन टोलवासीहरुले शुरुमा माटोको टिका लगाएर एक आपसमा शुभकामना आदान प्रदान गरे । उनीहरुले उद्यमशील टोललाई पूर्ण प्रांगारिक र जैविक खेतीको नमूना टोल बनाउने प्रण सहित होली पर्व मनाएका हुन् । कार्यक्रममा टोलवासी एवं प्रदेश योजना आयोगका पुर्व सदस्य तथा नेपाली कांग्रेसका नेता अर्थ विज्ञ डा. दामोदर भुसालटोलका जेष्ठ नागरिक रामअसारे कठरिया थारु, रबहादुर घिमिरे,टोल विकास संस्थाका उपाध्यक्ष सरगम विक,कोषाध्यक्ष हमबहादुर विकले टोललाई अर्गानिक खेतीमा देशमै नमूना टोल बनाउने संकल्पसहित माटोको टिका लगाएर त्यसपछि मात्र अरु रंग लगाएका थिए ।
सो अवसरमा बोल्दै प्रदेश योजना आयोगका पुर्व सदस्य डा. भुसालले उद्यमशील टोलले सिंगो टोललाई प्रांगारिक जोन बनाउने अभियान शुरु गरेको भन्दै प्रांगारिक खेती प्रवद्र्धनका लागि स्थानीय, प्रदेश र संघीय सरकारको ध्यान जानुपर्ने बताए । उनले प्रांगारिक कृषि उत्पादनलाई पर्यटनसँग जोड्न सकिने बताए । मानव स्वास्थ्य र खेतीयोग्य जग्गाको माटो सुरक्षाका लागि पनि प्रांगारिक कृषिलाई प्रवद्र्धन गर्न तीनै तहका सरकारले किसानलाई मल, बिउ, सिंचाईको उचित प्रबन्ध, उत्पादनमा आधारित अनुदान र बजारीकरण गरिदिनुपर्ने डा. भुसालले सुझाए ।
डा. भुसालले देशको कूल जनसंख्याको दुई तिहाई कृषिमा संलग्न रहे पनि सरकारले बजेटमा कृषिलाई प्राथमिकतामा राख्न नसकेको हुंदा कृषि क्षेत्रमा कूल बजेटको कम्तीमा १० प्रतिशत बजेट विनियोजन गर्नुपर्ने माग गरे । डा. भुसालले हरेक सांसद र जनप्रतिनिधिले कृषिलाई प्राथमिकता दिएर आफै आत्मनिर्भर भए मात्र देश कृषिमा आत्मनिर्भर हुन सक्ने बताए ।