खोज

रोजगारीको लागि करिब २ बर्ष कतारमा पसिना बगाएका रूपन्देहीको तिलोत्तमा नगरपालिका वडा नम्बर १४ बनकट्टीका भण्डारी दम्पत्तीले अहिले पशुपालन पेशामा लागेर राम्रो आम्दानी गरेका छन् ।
वि.सं. २०६३ साल माघ २५ गते दुर्गा पशुपालन फर्म दर्ता गरेका भुवन भण्डारी र दुर्गा भण्डारीले अहिले पशुपालनबाट नै छोराछोरीहरूलाई उचित शिक्षा दिक्षा दिनुको साथै राम्रो आम्दानी गरेका हुन् ।
३ वटा गाईबाट सुरु गरेका उनीहरूको फर्ममा अहिले गाई भैंसी गरेर १७ वटा छन् । ४ वटा भैंसी र अन्य सबै गाई हुन् । होलिस्टन, जर्सी गाई र भैंसीमा अर्ना जातको भैंसी उनीहरूले पालेका हुन् ।
दैनिक ५० लिटर दूध बिक्री गर्दै आएका भण्डारी दम्पत्तीले स्थानीय टिकुलीगढ दुग्ध उत्पादक सहकारी संस्था मार्फत दुध बिक्री गर्दै आएका छन् । फ्याटको आधारमा ४८ देखि ५० रूपैयाँ प्रतिलिटर पर्ने गरेको फर्म सञ्चालक दुर्गा कुमारी भण्डारी बताउँछिन् ।
उनी भन्छन्–‘विदेशमा पसिना बगाउनु भन्दा पनि स्वदेशमा नै केही गरेर जीविकोपार्जन गर्न सकिन्छ भन्ने हेतुले यहाँ लागेका हौं ।’ वि.सं. २०७२ सालमा कतारमा दुई बर्ष काम गरेको अनुभव श्रीमान भुवन भण्डारीको रहेको छ । उनी विदेश जाने मोह त्याग गरेर स्वदेशमा आएर पशुपालन पेशामा लागेका हुन् । उनले विदेशमा २ बर्षसम्म पसिना बगाएपनि यसको प्रतिफल खासै पाउन नसकेको कारण स्वदेशमा नै लागेको बताए । उनले भने–‘विदेशमा भन्दा पनि स्वदेशमा नै केही नयाँ कार्य गर्नको लागि सोँच राखेर यहाँ सुरु गरको हुँ, पशु गोठालो भएपनि सन्तुष्ट छु ।’ पशुपालनबाट नै दुई जना छोराहरूलाई निजी विद्यालयमा समेत शिक्षा दिक्षा दिन सफल भएको उनको भनाइ रहेको थियो ।
३ कठ्ठा क्षेत्रफलमा फैलिएको उनीहरूको फर्ममा सोही क्षेत्रफलको अनुपातमा घाँस खेती गरेका छन् । महिनामा २० हजार भन्दा बढि खर्च कटाएर बचत हुने गरेको उनीहरूको भनाइ रहेको छ ।
अभियान कृषि सहकारी संस्था बुटवल देवीनगरको सदस्य समेत रहेकी दुर्गा भण्डारीले लगानी अझै बढाउने योजना भएपनि सोही अनुपातको लागानी गर्ने रकम अभाव भएको बताउँछिन् ।
उनले अहिले करिब ३० लाख रूपैयाँ बराबरको लगानी फर्ममा भैसकेको जानकारी दिँदै नेपाल सरकारबाट प्रदान गरिने सहुलितयत दरका कृषि कर्जा समेत नपाएको गुनासो गरेका छन् । सरकारले कृषि तथा पशुपालन क्षेत्रमा अनुदान लगायतका विभिन्न कुराहरू ल्याएपनि यसबाट आफुहरू लाभांवित हुन नसकेको उनको भनाई रहेको छ ।
सहकारीबाट र केही बैंक बाट समेत ऋण लिएर पशुपालन गरिएको जानकारी दिदै उनले मासिक किस्ता तिर्नकोलागि त्यहीबाट नै सहज भएको बताउछन् । सबै भैसी र गाईको पशु विमा समेत गरिएको कारण कुनै पनि समस्या नभएको उनको भनाई रहेको छ । उनीहरूले पालेको सबै गाई र भैसी को एनएलजी कम्पनीले विमा गरेको छ ।
अहिले करिव ३० लाख रूपैयाँ बराबरको स्थीर सम्पत्ती जोडन् सफल भएको बताउने भण्डारी दम्पत्तीले निकट भविश्यमा विभिन्न निकायको सहयोग भएमा यसलाई अझ वृहत बनाउने समेत बताए । à