खोज

प्रदेश पाँचको नामाकरण र राजधानी अविलम्व टुंगो लगाउन नेपाली कांग्रेस ५ नम्बर प्रदेशका जिल्ला सभापतिहरूले माग गरेका छन् । नेपाली कांग्रेस प्रदेश पाँचका जिल्ला सभापतिहरूको शुक्रवार प्यूठानको स्वर्गद्धारीमा वसेको वैठकले उक्त माग गरेको हो ।
नेपाली कांग्रेस प्यूठानका सभापति अमरप्रसाद भण्डारीको अध्यक्षतामा भएको बैठकले अन्य विभिन्न निर्णय समेत गरेको छ । वैठकले सरकारको कार्यशैली, पार्टी सुदृढीकरण तथा आगामी महासमिति बैठक वारे पनि विभिन्न निर्णय गरेको नेपाली कांग्रेस रोल्पाका सभापति अमरसिं पुनले जानकारी दिए ।
वर्तमान सरकारप्रति जनताको ठूलो आशा अपेक्षा रहे पनि जनताको न्यूनतम र आधारभूत आवश्यकता समेत पुरा हुन नसक्दा जनताहरूमा नैराश्यता बढेको बैठकले ठहर गरेको छ । बैठकले वर्तमान सरकारको रवैया र गतिविधि प्रति तिव्र असन्तुष्टी जनाएको छ । सरकार गठनको ९ महिना पुरा हुँदा पनि शान्ति सुरक्षा र जनजिविकाका सवालमा सरकार गम्भीर नभएको आरोप लगाएको छ । खाद्यान्न लगायत अन्य अत्यावश्यक सामग्रीको चरम मूल्य वृद्धि, विभिन्न वहानामा स्थानीय सरकारले उठाउने करले निम्न स्तरका जनताको दैनिक जीवनयापनमा कष्टकर बन्दै गएको बैठकले ठहर गरेको छ ।

हत्या हिंसा वृद्धी हुँदा समेत सरकार रमिते वनेर हेरिरहेको, हत्या आरोपीलाई पक्रनुको साटो अपराधीहरुलाई संरक्षण दिने कार्यमा सरकार लागेको जस्ता आरोप लगाइएको छ । वैठकले यथासिघ्र जनविरोधि कार्य रोकी शान्ती सुव्यवस्था कायम गर्न तथा जीवन यापन सहज वनाउन सरकारसँग माग समेत गरेको छ ।
यसैगरि पार्टीबाट संघीय संसद र र प्रदेश सभामा निर्वाचित प्रतिनिधिहरुले जनसरोकारका विषयमा शसक्त र रचनात्मक प्रतिपक्षको भूमिका खेल्नु पर्ने सुझाव पनि दिएको छ । ५ नम्वर प्रदेश अन्तरगतका सवै जिल्लामा संगठन सुदृढीकरण र गाउँ केन्द्रीत अभियान संचालन गर्दै पार्टी जिल्ला सभातिहरुको वैठक समेत घुम्ति रुपमा राख्ने निर्णय गरेको छ । पार्टीको आगामी महासमिति वैठकमा जिल्ला सभापतिहरुको हेटौडा भेलाले निर्दिष्ट गरे वमोजिम विधान मस्यौदामा प्रस्तुत हुने निर्णय समेत गरेको छ । वैठकले पार्टी रुपन्देहीका सभापति अव्दुल रजक गद्धीको सिघ्र स्वास्थ्य लाभको कामना गर्दै स्वर्गद्धारी विकासका लागि जोडदार आवाज उठाउने निर्णय समेत गरेको वैठकमा नेपाल विद्यार्थी संघ रोल्पाका योगेन्द्र अनुपम जीसीले जानकारी दिए ।
वैठकमा नेपाली कांग्रेस रोल्पाका सभापति अमरसिं पुन, कपिलवस्तुका सभापति सुरेन्द्र आचार्य, पाल्पाका सभापति वीरवहादुर राना, वाँकेका सभापती किरण कोइराला, अर्घाखाँचीका सभापति विष्णु भुसाल, दाङका सभापति किर्तिवहादुर खड्का, वर्दियाका सभापति संजय गौतम, नवलपुरका सभापति अर्जुनकुमार पोख्रेल र गुल्मीका सभापति भुवन श्रेष्ठको उपस्थिति रहेको वताइएको छ ।
à