खोज

हाम्रो पहलः भोकमुुक्त विश्व–२०३० भन्ने मुल नाराका साथ बुटवलमा ३८ औ विश्व खाद्य दिवस मनाइएको छ । भूमि व्यवस्था कृषि तथा सहकारी मन्त्रालय प्रदेश नम्बर ५ अन्तर्गतको कृषि विकास निर्देशनालयको आयोजनामा विश्व खाद्य दिवसको अवसरमा अन्तरक्रिया कार्यक्रम गरी यो दिवस मनाइएको हो ।
प्रदेश नम्बर ५ मा रहेको भूमि व्यवस्था कृषि तथा सहकारी मन्त्रालय अन्तर्गतका सबै जिल्ला कृषि ज्ञान केन्द्र, भेटनरी अस्पताल तथा पशु विज्ञ केन्द्रका प्रमुख तथा प्रतिनिधि, किसान, सरोकारवाला निकाय र कृषि तथा पशु क्षेत्र सम्बन्धीत व्यक्तिहरूको सहभागीतामा तिलोत्तमामा रहेको कृषि विकास बैंकको क्षेत्रीय तालिम केन्द्रमा कार्यक्रम गरिएको हो । कार्यक्रममा बोल्दै प्रदेश नम्बर ५ भुमि व्यवस्था कृषि तथा सहकारी मन्त्रालय मन्त्री आरती पौडेलले किसानबाट आएको सल्लाह सुझावलाई अक्षरांस पालन गर्दै अगाडी बढ्ने बताएकी छिन् ।
उनले सबैको साझा पहलबाट मात्रै प्रदेश समृद्धिको आधारहरू खडा हुने भन्दै यसको लागि किसानदेखि लिएर नीति निर्माण पक्षहरू सबै नै लाग्नुपर्ने बताईन् । कोही पनि भोकमरीको कारणबाट अकालमा नै ज्यान गुमाउनु पर्ने अवस्था आउन नहुने भनदै उनले प्रदेश सरकारले ल्याएको करार कृषि खेतीलाई पुर्णरूपमा कार्यान्वयन गरी किसानहरूको पक्षमा काम गर्न लागेको बताईन् ।
कार्यक्रममा कार्यपत्र प्रस्तुत गर्दै भूमि व्यवस्था कृषि तथा सहकारी मन्त्रालय प्रदेश नम्बर ५ कृषि विकास निर्देशनालयकी प्रमुख डा. शान्ता कार्कीले खाद्य संप्रभुताको लागि विद्यमान नीति, कार्यक्रम र भावी योजनाको विषयका बारेमा प्रष्ट पारेकी छिन् । उनले पछिल्लो समयमा संरचना परिवर्तनसँगै धेरै अभावको बीचमा प्रदेश सरकार मातहतका कार्यालयहरूले काम गरेको भन्दै विश्वमा ११ प्रतिशत भन्दा बढि मानिसहरू भोकमरीमा परेको तथ्यांक रहेको बताइन् । उनले सबैले खाद्य सुरक्षाको लागि खाद्यन्न उत्पादनमा जोड दिनुपर्ने भन्दै तबमात्र नेपाल खाद्य सुरक्षामा नमुना बन्न सक्ने बताईन् ।
प्रदेश नम्बर ५ को खाद्य सुरक्षा स्थिति विश्लेषण, चुनौती र संभावनाको विषयमा विश्व खाद्य कार्यक्रममका पन्नलाल महर्जनले कार्यपत्र प्रस्तुत गरेका थिए । यस्तै कार्यक्रममा प्रदेश नम्बर ५ का खाद्य सुरक्षा प्रवद्र्धनमा कृषि अनुसन्धानको भूमिका विषयमा राष्ट्रिय गहँुवाली अनुसन्धान कार्यक्रम भैरहवाका शेष रमण उपाध्यायले कार्यपत्र प्रस्तुत गरेका थिए ।
कार्यक्रममा कृषि विकास बैंक क्षेत्रीय कार्यालयका क्षेत्रीय प्रबन्धक मिनराज पोखरेल, प्रदेश योजना आयोग, मुख्य मन्त्री तथा मन्त्री परिषद्को कार्यालय बुटवलकी सदस्य पुष्पा भुषाल, भुमि व्यवस्था कृषि तथा सहकारी मन्त्रालय प्रदेश ५ का सचिव यम नारायण देवकोटा, किसानका लागि उन्नत विउ विजन कार्यक्रम बुटवलका प्रोग्राम मेनेजर कौशलराज पौडेल, विउविजन प्रयोगशाला भैरहवाका तेज नारायण गैरै, रूपन्देहीका किसान अमृत नारायण श्रेष्ठ, कपिलवस्तुका किसान वृजहरी चौधरी लगायतले आ आफ्नो भनाइ राखेका थिए ।