खोज

बाँके खजुरा गाउँपालिका—४ की प्रतिमा शर्माले पूर्ण छात्रबृत्तिमा एमबीबीएस अध्ययन गर्न नाम निकालेपछि गाउँमा खुसियाली छाएको छ । आर्थिकरूपमा कमजोर परिवारकी प्रतिमाले त्रिभुवन बिश्वबिद्यालय अन्तर्गत पूर्ण छात्रबृत्तिमा एमबीबीएस अध्ययनका लागि लिएको परीक्षामा सर्बोत्कृष्ट नतिजा सहित नाम निकाल्न सफल भएकी थिइन् ।
सानैबाट जेहेन्दार प्रतिमाको एमबीबीएस पढेर डाक्टर बन्ने धोका पुरा हुने भएपछि यतिबेला उनको परिवार मात्र नभई गाउँले नै खुसी साटासाट गरिरहेको छ । उनको सानो झुप्रो घरमा दैनिक बधाई दिनेको ओइरो लागेको छ । बधाई मात्र होइन जनप्रतिनिधि र स्थानीयले प्रतिमालाई मनग्ये आर्थिक सहयोग समेत जुटाएका छन् ।
‘हुनेखाने मात्र डाक्टर बन्छन् भन्ने कुरा भ्रम रहेछ । पढ्नमा राम्रो भए झुपडीमा बसेका बालबालिका पनि डाक्टरी पढ्न पाउने रहेछन् ।’—सोही वडाका अध्यक्ष तिलकबिर सुनारले भने,—‘प्रतिमाले सबैलाई त्यही उदाहरण देखाइन् । हामी धेरै खुसी छौं ।’
छात्रबृत्तिमा नाम निकाले पनि सुरुमा भर्नाका लागि न्यूनतम रकम पनि परिवारसँग भएन ।

त्यो कुरा थाहा पाएपछि वडा अध्यक्ष सुनार कस्सिए । उनले भने,—‘हामी सबै मिलेर सहयोग रकम जुटाईरहेका छौं ।’ अध्यक्ष सुनारको अगुवाई सोमबारसम्म एकलाख ९१ हजार ६३ रुपियाँ संकलन भएको छ । वडा अध्यक्ष सुनारले सबैभन्दा बढि ५० हजार रुपियाँ सहयोग गरेका छन् ।
शर्माको भर्ना नछुटोस भनेर स्थानीय सन्तोष श्रेष्ठले आफ्नो नाममा ऋण लिएर शर्माका अभिभावकलाई रकम दिएपछि शर्माको तत्काल भर्ना भएपनि थप रकम संकलनमा स्थानीयहरू जुटेका छन् । वडा अध्यक्ष सुनार सहित सन्तोष श्रेष्ठ, टोपेन्द्र खत्री, बासुदेव तिवारी लगायतको सक्रियतामा सहयोग संकलन भएको हो । वडा अध्यक्ष सुनारले सहयोगका लागि बिभिन्न तह र तप्काका सबैसँग अनुरोध समेत गरेका छन् । शर्माले खजुरामा रहेको सामुदायिक विद्यालय ज्ञानोदय माविबाट माध्यमिक शिक्षा पुरा गरेकी हुन् । शर्माका अनुसार परीक्षा शुल्क र खाना बस्नको खर्च विद्यार्थी आफैले ब्यहोर्नुपर्दछ । ‘सबैको साथ र सहयोगले हौसला मिलेको छ,’ शर्माले भनिन् ।