खोज

बाँके जिल्लाको जमुनाह नाकामा खसीको तस्करी हुन थालेको छ । दशैं तिहारको बेलामा सबैभन्दा बढि खपत हुने खसी तस्करहरूले बिना भन्सार नेपालगन्ज भित्र्याउने गरेको पाइएको हो ।
बिना भन्सार भित्र्याईएको नेपालगञ्ज उप–महानगरपालिका वडा नम्बर–९ बाँके गाउँबाट वडा प्रहरी कार्यालय नेपालगञ्जको टोलीले १६ खसी बोका नियन्त्रणमा लिइएको छ । वडा प्रहरी कार्यालय नेपालगञ्जका इन्चार्ज प्रहरी निरीक्षक नारायण डाँगीले खसीसँगै अण्डा ५६ क्यारेट समेत नियन्त्रणमा लिइएको जानकारी दिए । यस्तै कोरियनपुरबाट अवैधरूपमा भारतबाट साइकलमा नेपाल ल्याउँदै गरेको अवस्थामा ९४ वटा ब्रोइलर र ३ वटा साइकल नियन्त्रणमा लिइएको छ । नियन्त्रणमा लिइएको खसी सहितलाई आवश्यक कारबाहीको लागि पशु क्वारेन्टाइन नेपालगञ्जमा बुझाइएको इन्चार्ज प्रहरी निरिक्षक डाँगीले बताए । चाडपर्वका समयमा बिना भन्सारका खसीबोका भित्रिन सक्ने भन्दै प्रहरीले निगरानी बढाएको छ ।
दशैं र तिहार जस्ता चाडपर्वका समयमा खसीका लागि भारतमै निर्भर बन्नुपर्ने अवस्था रहेको छ ।
नेपालगन्जमा मात्र नभई देशैभरी भारतमा पालिएका खसीको मासु धेरै प्रयोग हुने गरेको पाइएको छ । सबैका लागि नभई नहुने यही खसीको मासुका लागि भने भारतमै निर्भर हुनुपर्ने अवस्था रहेको नेपालगन्ज मासु व्यवसायी संघका अध्यक्ष भरत महत्तोले जानकारी दिए । नेपालगन्जका सामान्यतया नेपालगन्जमा खसी, कुखुरा, रांगा, बंगुरको मासु धेरै रुचाएको पाईन्छ । यस बाहेक हाँस लगायतको मासु पनि रुचाएको पाईन्छ । बाँकी अन्य कुरा छिटफुट मात्र हो । नेपालगन्जमा कुखुरा स्थानीय नै ल्याइन्छ । ‘खसी भने भारतकै भर पर्नुपर्ने अवस्था छ । त्यहाँबाट खसी नआउने हो भने अभाव सिर्जना हुन्छ भन्दा फरक पर्दैन ।’ महत्तोले भने,—‘दशैं र तिहार जस्ता पर्वमा दोब्बरले मासुको खपत हुने भएकाले भारतबाट खसी आयातको मात्रा पनि त्यसरी नै बढ्ने गरेको छ ।’ नेपालगन्जमा आउने त्यस्ता खसी देशका बिभिन्न भागमा सप्लाई पनि हुन्छ । ‘मैले यसपाली च्यांग्रा पनि ल्याउने की भन्ने सोचिरहेको छु । हेरौं के हुन्छ ?’— महत्तोले भने ।
मासुको बिक्री बितरणमा नेपालगन्ज मासु व्यवसायी संघले अत्यन्त होसियारी अपनाएको दाबी
गरेको छ । सरसफाई र गुणस्तरमा हरेक व्यवसायीले ध्यान दिएको पाईएको महत्तोले बताए । बाणिज्य कार्यालय नेपालगन्जका निमित्त प्रमुख कृष्ण पौडेलले पहिलाको भन्दा अहिले धेरै सुधार आएको बताए । उनले अझ सुधार गर्न बाँकी रहेको जानकारी दिएका छन् ।