खोज

माण्डवी गाउँपालिका–५ रम्दी सिखे्रकी क्वारी थापाले ६९ वर्षको उमेर हुँदासमेत बिजुलीको उज्यालो अनुभव गरिनन् । खरले छाएको झुपडीमा उनी वर्षौदेखि एक्लो जीवन विताइरहेकी छन् । घरखर्च धान्नै मुश्किल पर्ने थापालाई बिजुली जडान गर्ने सपनाजस्तै लाग्छ । चर्किएको घरमा उनको जीवन गुज्रिरहेको छ ।
हालै गाउँपालिकाबाट घरमा बिजुली जडान गरिदिने खबर सुनेपछि उनी खुसी छन् । ‘यतिका वर्ष अध्याँरोमै बिते’,उनले भनिन्,‘गाउँपालिकाले बिजुली ल्याइदिने खबर सुनेकी छु । चाँडै गर्दिए हुन्थ्यो ।’ उनका श्रीमानको ३० वर्ष अघि नै मृत्यु भइसक्यो । श्रीमान्को मृत्युपछि थापाका दुःखका दिन शुरु भएका हुन् । एउटी छोरी थिइन, उनको पनि विहे भइसक्यो । गाउँभरी सवैको घरमा बिजुली बलेको छ । विधुवा भत्ताले थापाको जीवन चलेको छ । उनीसहित आर्थिक अभावले विजुली जडान नगर्नेहरू गाउँमा तीन जना छन् । स्थानीय धन बहादुर घर्ति र चिन्त बहादुर थापाको घरमा विद्युत विस्तार हुन नसकेको स्थानीय बल बहादुर घर्तिले बताए ।
आफ्नै गाउँपालिकाभित्रै झिमरुक जलविद्युत आयोजना संचालन भएपनि गरिबीकै कारण उनीहरूले उज्यालो महशुस गर्न नपाएका हुन् । जनप्रतिनिधि चुनिएपछि गरिबको घरमा विद्युत बिस्तार हुने खवरले गाउँलेहरू हर्षित छन् । गाउँमा विद्युत विस्तार भएपनि वर्षौदेखि बिजुली जडान गर्न नसकेकाहरूको घरमा उज्यालो गराउने कार्यक्रम रहेको गाउँपालिका अध्यक्ष श्रीधर रोकामगरले जानकारी गराए । आर्थिक अवस्था कमजोर भएर विद्युत जडान गर्न नसकेकाहरूलाई पहिलो प्राथमिकता दिएर योजना अघि बढाउने उनको भनाई छ । ‘केही घरमा पैसा नभएकै कारण बिजुली जडान नभएको पाइएको छ’,उनले भने,‘त्यस्ता व्यक्तिहरूलाई पहिलो प्राथमिकता दिएर काम गर्छौ ।’ गाउँ गाउँबाट घरपरिवार पहिचान गर्ने काम भइरहेको समेत उनले बताए ।
क्रमागत रूपमा योजना संचालन गर्नेगरी यसवर्ष विद्युतीकरण विस्तारका लागि दशलाख रूपैयाँ बजेट विनियोजन भएको प्रमुख प्रशासकिय अधिकृत नारायण पौडेलले जानकारी दिए । ‘धेरैजसो विद्युत पहुँच नै नपुगेका छन्’,उनले भने,‘निवेदन संकलन गर्ने काम भइरहेको छ । प्राथमिकताका आधारमा सहयोग गर्छौ ।’ बुटवल पावर कम्पनी लिमिटेडसँग सहकार्य गरेर विद्युतीकरणको काम पुरा गर्ने योजना रहेको उनले बताए । गाउँपालिकाले सम्वन्धित व्यक्तिलाई लुज तार, जडान खर्च लगाएत सहयोग गरेपछि नियमित विद्युत महशुल उपभोक्ताले नै तिर्नुपर्ने छ । हालसम्म २ सय ९९ घरधुरीमा विद्युत्त बिस्तार हुन नसकेको तथ्यांक संकलन भएको उनले जानकारी दिए । यसमध्ये वडा नम्बर एकमा एकसय नौ जना, दुईमा ७४, तीनमा ५४, चारमा ४५ र पाँचमा १७ जना छन् । संकलित तथ्यांकलाई छिट्टै अन्तिम रूप दिएर योजना अघि बढाउने उनले बताए । माण्डवी गाउँपालिकाभरी विद्युत विस्तार गर्ने क्षेत्राधिकार बुटवल पावर कम्पनी लिमिटेडको हो । साविकका २३ गाविसमा विद्युत विस्तार गर्दै आइरहेको वितरण प्रमुख श्याम थापाले जानकारी गराए । चालु आर्थिक वर्षमा विद्युतीकरणका लागि एक करोड ५० लाख रूपैयाँ बजेट विनियोजन भएको समेत उनले जानकारी गराए । à