खोज

जिल्ला बाहिर महंगोमा पढ्नुपर्ने प्राविधिक शिक्षा जिल्लाको मध्य क्षेत्रमा शुरुभएपछि विद्यार्थीहरू खुसी भएका छन् । आइ.एस.सी, एजी (बाली विज्ञान) शंकाय तर्फको पढाई क्षेत्र विकास माध्यमिक विद्यालय प्यूठान नगरपालिका–७ विजुवार पूण्यखोलाले शुरु गरेको छ ।
भदौको पहिलो हप्तादेखि पठन पाठन सुचारु गरेपनि औपचारिक उद्घाटन बुधवार गरिएको छ । प्यूठान सहित बाहिरी जिल्लाका गरी हाल ४० जना विद्यार्थी भर्ना भएका छन् ।
‘बाली विज्ञान विषय नै पढ्ने मन थियो’,प्यूठान नगरपालिका–८ धर्मावती खप्रेङखोलाका १६ वर्षिय अरूण थापाले भने,‘बाहिरी जिल्ला गएर कसरी पढ्ने भन्ने चिन्ता थियो । जिल्लामै खुलेपछि सजिलो भयो ।’ घरपरिवारले समेत प्राविधिक शिक्षा पढ्न सुझाव दिएको उनले बताए ।
उनीजस्तै खलंगा सारीवाङकी हेमा केसीको पनि जिल्लामै प्राविधिक शिक्षा पढ्ने सपना पुरा भएको छ । ‘हामी पहिलो ब्याजी भयौँ’,उनले भनिन्,‘धेरै खुसी छौँ । घरबाटै आएर पढ्न पाइने भयो ।’ एक महिनाको अवधिभर पढाई समेत राम्रो चलिरहेको उनले अनुभव सुनाइन । बाहिरी जिल्ला गएर पढनुपर्ने आर्थिक अवस्था कमजोर भएका विद्यार्थीहरूलाई यसले धेरै सहजता दिलाएको छ ।
तीन वर्षे कोर्ष अध्ययन गर्नका लागि एक लाख ७० हजार रूपैयाँ शुल्क लाग्ने विद्यालय व्यवस्थापन समितिका अध्यक्ष उमाराम पौडेलले जानकारी गराए । जिल्लामा पढाई हुने मध्यमा आफूहरूले सवैभन्दा सस्तो शुल्क लिएको उनले दावी गरे । बुधवार प्यूठान क्षेत्र नम्वर २ का प्रदेशसभा सदस्य कृष्णध्वज खड्काले प्राविधिक शिक्षाको औपचारिक उद्घाटन गरेका छन् । उनले भर्ना भएका विद्यार्थीहरूलाई टिका लगाएर स्वागत गरे । कार्यक्रममा बोल्दै खड्काले राज्यले लिएको समृद्धिको सपना पुरागर्न प्राविधिक शिक्षाले मद्दत पु¥याउनेमा विश्वास व्यक्त समेत गरे । बाल्यकालमा यसै विद्यालयमा आफूले पढेको सम्झना गर्दै उनले विद्यालयको समग्र विकासमा विशेष भूमिका निर्वाह गर्ने आश्वासन दिए ।
क्षेत्रविकास सहित जिल्लाका तीन वटा विद्यालयमा बाली विज्ञान विषयको पढाई हुँदै आएको शिक्षा विकास तथा सम्वन्य इकाइ प्रमुख शिवराज पण्डितले जानकारी गराए । भानुभक्त मावी बर्वोट र बालविद्या मावी मरन्ठाना मजुवाले यसअघि नै पठनपाठन शुरु गरिसकेका छन् । ‘सामुदायिक विद्यालयहरू बेरोजगार उत्पादन गर्ने कारखाना जस्तै बन्न थाले’,उनले भने,‘समाज परिवर्तनको पहिलो आवश्यकता प्राविधिक शिक्षा बनिसक्यो । यसतर्फ सरोकारवाला लाग्नु जरुरी देखिन्छ ।’ व्यवसायिक र प्राविधिक शिक्षाले नै मुलुकलाई सही बाटोमा लैजाने उनले उल्लेख गरे ।
सिटीइभिटीबाट सम्वन्धन प्राप्त गरेर विद्यालयले प्राविधिक विषयको पढाई सुचारु गरेको प्राधानाध्यापक पिताम्वर खड्काले बताए । यस विषयको पढाई संचालन गर्नुपूर्व धेरै क्षेत्रबाट सहयोग मिलेको उनले सुनाए । विद्यालयको संस्थागत विकासका लागि प्यूठान नगरपालिकाले दश लाख, वडा कार्यालयबाट सात लाख, प्रधानमन्त्री कृषि आधुनिकीकरण परियोजना र सेभ द चिल्डे«नबाट ६÷६ लाख र यूवा तथा खेलकुद मन्त्रालयबाट चारलाख रूपैयाँ सहयोग प्राप्त भएको उनले बताए । प्राप्त सहयोगबाट विद्यालयमा चमेना गृह, पुस्तकालय निर्माण, विद्यालयको रंगरोगन, माटो परिक्षण, फर्निचर लगाएत क्षेत्रमा खर्च गरेको खड्काले जानकारी गराए । जिल्लाको मध्य क्षेत्रमा बालविज्ञान विषयमा पढाई भएपछि सवै क्षेत्रका विद्यार्थीहरूलाई पायक परको छ । मल्लरानी गाउँपालिकाको भानुभक्त मावी बर्वोटले धेरै वर्षअघिदेखि नौ देखि १२ कक्षासम्म बाली विज्ञान विषयमा पठनपाठन संचालन गरिरहेको छ ।