खोज

प्रधानमन्त्री कृषि आधुनिकीकरण परियोजना मकै जोन गुल्मीको सहयोगमा कृषि प्राविधिक शिक्षालय संचालन सहयोग कार्यक्रम अन्तर्गत रुरु गाउँपालिकाको एक विद्यालयलाई ७ लाख ७५ हजार लागतको संरचना तथा सामग्री हस्तान्तरण गरेको छ ।
रुरु गाउँपालिका अन्तर्गत जनबोध माध्यमिक विद्यालयलाई आईतबार एक कार्यक्रमका बीच प्रदेश नम्बर ५ का सामाजिक विकास मन्त्री सुदर्शन बरालको रोहवरमा परियोजना प्रमुख कुल प्रसाद दवाडीले उक्त सामग्री हस्तान्तरण गरेका हुन् । कार्यक्रममा कृषि अध्ययन अनुसन्धान तथा प्रसारका क्रियाकलापहरूको समन्यवयात्मक ढंगबाट संचालन गर्न तथा विद्यालय स्तरबाट नै विद्यार्थीहरूलाई कृषि क्षेत्रमा आकर्षण गर्ने उद्देश्य अनुरूप प्रधानमन्त्री कृषि आधुनिकीकरण परियोजना मकै जोनले प्रविधिमा आधारित सामग्री हस्तान्तरण गरेको परियोजना प्रमुख दवाडीले बताए ।
उक्त विद्यालयमा प्राविधिक धारतर्फ कृषि विषय अध्ययन गर्ने विद्यार्थीहरूलाई प्रयोगात्मक कक्षा संचालन गर्न सहयोग गर्ने उद्देश्यले उक्त सामग्री हस्तान्तरण गरिएको र यसबाट विद्यार्थीहरूको प्रयोगात्मक अध्ययनमा थप सहयोग पुग्ने सामाजिक विकास मन्त्री सुदर्शन बरालले बताए ।
परियोजनाबाट हस्तान्तरण गरिएका सामग्रीहरूमा स्क्रिन हाउस, जोत्नका लागि मिनी ट्रिलर, माटो परिक्षणका लागि टुल किट, चिस्यान मापक यन्त्र, माइक्रोस्कोप, कम्प्युटर, डिजीटल पि एच मिटर, रिफ्रयाक्टोमिटरलगायत रहेका छन् । विद्यालयलाई हस्तान्तरण गरिएका संरचना तथा सामग्रीहरूले आगामी दिनहरूमा प्रयोगात्मक कक्षा संचालनमा टेवा पुग्ने तथा विद्यार्थीहरूको प्रयोगात्मक ज्ञान वृद्धि भई कृषिको उत्पादन एवं उत्पादकत्व अभिवृद्धि गर्न सहयोग पुग्ने परियोजना प्रमुख दवाडीले बताए । सामग्री हस्तान्तरण कार्यक्रममा बोल्दै प्रदेश ५ का सामाजिक विकास मन्त्री सुदर्शन बरालले गुल्मी जिल्ला शिक्षा क्षेत्रमा अग्रपंक्तिमा रहेको जनबोध माविले आगामी दिनमा प्राविधिक शिक्षालय मार्फत स्थानीयस्तरमा नै दक्ष जनशक्ति उत्पादनमा उल्लेख्य भूमिका खेल्ने धारणा व्यक्त गरे ।
उनले विद्यालयको भौतिक संरचना सुधार मार्फत कृषि शिक्षाको गुणस्तर वृद्धिमा आगामी दिनमा प्रदेश सरकारबाट समेत सहयोग रहने प्रतिवद्धता समेत व्यक्त गरेका छन् । बरालले विद्यालय व्यवस्थापन समितिका पदाधिकारी, शिक्षक एवं अध्ययनरत विद्यार्थीहरूलाई कृषि शिक्षालाई थप प्रभावकारी एवं गुणस्तरीय ढंगबाट संचालन गर्न सुझाव दिए । विद्यालय व्यवस्थापन समितिका अध्यक्ष हरिप्रसाद ज्ञवाली, रुरु गाउँपालिकाका अध्यक्ष निलकण्ठ गौतम, नेकपा गुल्मीका नेता बुद्धि जिसी लगायतले परियोजनाले यसरी सामग्री हस्तान्तरण गरेर विद्यालय र विद्यार्थीहरूलाई सहयोग पुुराएको भन्दै परियोजना प्रति आभार व्यक्त गरेका थिए ।
मकै जोन परियोजनाले यसअघि गुल्मीको ईस्मा गाउँपालिका अन्तर्गत हिमालय माध्यमिक विद्यालय हस्तिचौर र धुर्कोट गाउँपालिका अन्तर्गत पाञ्चायन मावि जैसिथोकमा गरि हालसम्म तीनवटा कृषि प्राविधिक शिक्षालयहरूमा कुल २० लाख लागत बरावरको संरचना, औजार तथा उपकरणहरू हस्तान्तरण गरेको छ ।