खोज

जिल्लाको पृथ्वीचन्द्र अस्पतालका कर्मचारी र स्वास्थ्यकर्मी चिकित्सकले ड्युटी अवधीमा अनिवार्य रूपमा पोशाक र परिचयपत्र लगाउनु पर्ने अस्पताल विकास समितिले निर्णय गरेको छ । सरकारले उनीहरूलाई पोशाक भत्ता उपलब्ध गराए पनि पोशाक नलगाउने पाइएकोले समितिले तत्कालै पोशाक र परिचयपत्र लगाउन अनिवार्य गरेको हो ।
प्रदेश सरकार अन्तर्गत आएको ५१ सैया मुनिको अस्पतालमा प्रदेश सरकारले जिल्ला समन्वय समिति प्रमुखको अध्यक्षतामा तदर्थ समिति गठन गरे अनुसार सो तदर्थ समितिको आईतबार पहिलो बैठकले सो निर्णय गरेको हो ।
कर्मचारीले पोशाक नलगाई काम गर्दा अस्पतालमा आउने बिरामी र सेवाग्राहीहरू समेत झुक्किने गरेको हुँदा ड्युटी अवधी भरि अनिवार्य पोशाक लगाउनु पर्ने निर्णय भएको तदर्थ समितिका अध्यक्ष एवं जिसस प्रमुख शिव शंकर रायले बताए ।
केही महिनामै अस्पताल प्रति फैलिएको नकारात्मक प्रचार चिर्दै लैजाने र अस्पतालको सेवामा गुणस्तरियता ल्याउने गरि योजना समेत बनेको उनले सुनाए । विगतका समिति र अस्पताल कर्मचारी चिकित्सक बिच प्रभाकारी ढंगले समन्वय र तालमेल नहुँदा अस्पताललाई अस्तब्यस्त बनेको थियो ।
अब यसलाई भएको साधन स्रोतको अधिक्तम प्रयोग गरेर विरामी सेवाग्राहीलाई बढी भन्दा बढि सेवा प्रदान गर्ने र बाकी स्रोत साधनको लागि सरोकारवाला निकायसंग समन्वय गरि ब्यवस्थापन गर्ने रणनीति समेत बनाउन लगाईएको अध्यक्ष रायले जानकारी गराए ।
पहिलो बैठकमा तत्काल उपलब्ध कर्मचारी र चिकित्सकलाई पोशाकमा ड्युटी समयसम्म अस्पतालमा विरामीलाई सेवा प्रदान गर्ने,परामर्श सेवा दिईने गरि निर्णय भएको र सोही अनुसार निर्देशन पनि दिइएको छ । अस्पतालमा आउने विरामी र सेवाग्राहीलाई सहज ढंगले समस्या बुझ्ने गरि एक जना कर्मचारीलाई सोधपुछ (रिसप्सन) टेबल नै राख्ने लगाइएको उनले सुनाए । प्रदेश सरकारको सामाजिक विकास मन्त्रालयले अस्पताल सुदृढिकरणका लागि के के आवश्यक छ ? समेत माग गरेको हुनाले त्यसको तयारीमा लगाइको छ । एक साता भित्र सबै विवरण आइसकेपछि मन्त्रालयमा पेश गरिने छ । मन्त्रालयले तत्कालका लागि अस्पताललाई एक एम्बुलेन्स समेत उपलब्ध गराउने हँुदा यसले पनि गाउँबाट सहज ढंगले अस्पतालमा बिरामी आउने छन्, अध्यक्ष रायले भने, अब अस्पतालबाट अधिकतम सेवा प्रदान गर्दै अस्पताल प्रति जनसमुदायको विश्वास जगाउने गरि कार्य गरिने छ ।
सकभर अस्पतालमा आउने विरामीलाई रिफर सेन्टरको रूपमा प्रयोग नहुने गरि अस्पतालमा विशेषज्ञ सेवा प्रदानका लागि विशेषज्ञ चिकित्सकलाई ल्याउने प्रयासमा लागि परेका छौं । अस्पतालमा विशेषज्ञ सेवा प्रदान नगर्दा पनि बिरामी अस्पताल छाडेर निजी क्लिनिकमा गएर महँगो शुल्क तिर्न परेको उनको भनाइ थियो । यो अस्पतालको सबै भन्दा राम्रो पक्ष चौबिसै घण्टा फर्मेसी सचालन हुनु हो । यसले अस्पतालमा विगत भन्दा अहिले विरामीको चाँप बढ्दै गएको छ । पहिला अस्पतालका चिकित्सकले लेखेको औषधी बाहिर बजारका मेडिकलवालाले कम गुणस्तरको औषधी थमाई दिने हुँदा पनि विरामीलाई औषधीले काम नगर्दा त्यसको असर अस्पतालको सेवा मै प्रश्न चिन्ह लाग्ने गरेको थियो ।
तर अहिले अस्पताल भित्रै सहुलियत मूल्यको फार्मेसी संचालन छ, अध्यक्ष रायले भने, अर्को नकारात्मक प्रचार भनेको अस्पतालमा डाक्टर छैन भन्ने हो । तर अहिले पनि अस्पतालमा ६ जना मेडिकल अधिकृत काम गर्दै आएका छन् । अस्पतालकै केही कर्मचारीले दरबन्दीको चिकित्सक नभए पछि डाक्टर नै छैन भन्ने प्रचार गर्ने गरेका थिए । उनीहरूले छात्रवृतिका डाक्टरलाई पनि सरकारले खटाएको छ । उनिहरू पनि डाक्टर नै हुन् । डाक्टरी पढेर पास गरेरै सेवा दिन आएका छन् । तिनलाई डाक्टर नै नमान्नु र भ्रम छरिएका कारण पनि समस्या थियो ।
अब समितिले असोज भित्रै परिणाम देखिने गरि अस्पतालमा काम गर्ने योजना बनाएको छ । अस्पतालको सबै कोठामा एसी जडान गरिने, जेनेरेटरबाट चौबिसै घण्टा विद्युतको उपलब्धता गराउने र बिरामी तथा बिरामी कुरुवाका लागि पनि उचित ब्यवस्थापन गरि अस्पताल विकास समितिले सोच बनाएको उनले दाबी गरेका थिए ।