खोज

कपिलवस्तु नगरपालिका वडा नम्बर ५ (साबिक गोटिहवा) लाई एक कार्यक्रमबीच पूर्ण भर्ना र पूर्ण साक्षर घोषणा गरिएको छ । सरल नेपाल र दलित सामाजिक बिकास केन्द्रको सहयोगमा वडा कार्यालयको आयोजनामा सो घोषणा गरिएको हो । वडाका ५ बर्षदेखि १२ बर्ष उमेर समूहका सबै बिद्यालय भर्ना तथा ९६ प्रतिशत जनसंख्या साक्षर भएपछि वडा अध्यक्ष दिरेप कुमार चौधरीले वडालाई साक्षर घोषणा गरेका हुन् । बि.सं. २०६८ को जनगणनामा ९ सय १८ जना निरक्षर रहेकोमा ८ सय ८६ जनालाई साक्षर बनाइएको उनले बताए । बिद्यालय भर्ना अभियानमा वडाका सम्पूर्ण बालबालिकालाई बिद्यालयमा भर्ना गराइएकोमा एक पूर्ण अपाङ्ग र एक आंशिक अपाङ्गलाई बिद्यालय भर्ना गराएपछि घोषणा गर्न सफल भएको चौधरीले बताए । कार्यक्रममा तोकिएको मापदण्ड पुरा भएपछि वडालाई पूर्ण भर्ना र पूर्ण साक्षर घोषणा गरिएको उनले बताए । यस वडामा सम्पन्न गरिएको घोषणा अभियानलाई अन्य वडामा निरन्तरता दिइने कपिलवस्तु नगरपालिकाका नगर प्रमुख किरण सिंहले बताए ।
वडालाई पूर्ण भर्ना र पूर्ण साक्षर घोषणा गरिएसँगै अरू वडाले पनि सोको सिको गर्नुपर्ने प्रमुख जिल्ला अधिकारी अर्जुन प्रसाद पोखरेलले बताए । वडालाई घोषणासँगै बिद्यालयमा भर्ना भएका बिद्यार्थीलाई टिकाई राख्न भूमिका खेल्नु पर्ने सुझाव दिए । ‘बिद्यार्थी भर्नासँगै अभियानमुलक गतिबिधिमा सरिक गराउने र प्राबिधिक शिक्षामा समेत लगानी गर्न आवश्यक छ,” प्रजिअ पोखरेलले भने । वडा कार्यालयको आयोजनामा वडालाई घोषणा गर्नु उदाहरणीय भएको बताउँदै शिक्षामा लगानीका लागि सबैले सरोकार बृद्धि गर्नुपर्ने पूर्व मन्त्री तथा काँग्रेस नेता दिप कुमार उपाध्यायले बताए । “शिक्षामा लगानी र सुधार बिना बिकास सम्भव छैन ।
प्रत्येक बालबालिकाको शिक्षाको अधिकार सुनिश्चितताका लागी सबै लाग्नुपर्छ,” उपाध्यायले भने । शिक्षा क्षेत्रको लगानीले राष्ट्र बिकासमा टेवा पुग्ने जिल्ला समन्वय समितिका प्रमुख नारायणप्रसाद खनालले बताए । कार्यक्रममा कपिलवस्तु नगरपालिकाका प्रमुख प्रशासकिय अधिकृत बिमलराज आचार्य, वडा नम्बर ३ का वडा अध्यक्ष प्रकाश गैरे, समाजसेवी तेज कुमार बौद्धाचार्य लगायतले पूर्ण भर्ना र पूर्ण साक्षर घोषणाको अभियानलाई अन्य वडामा निरन्तरता दिनुपर्ने सुझाव दिएका थिए ।