खोज

सिद्धार्थनगर नगर पालिका वडा नम्बर ४ बस्ने बर्ष ७ की जेव्रा खातुन र बर्ष ५ की जाद्रा खातुन अन्य दिन जस्तै बिहिबार बिद्यालय जान सकेनन् । बिद्यालय जान भनि हिडेका उनिहरू दुवै जना भैरहवा स्थित भिम अस्पतलामा उपचार गराउन जानु पर्यो । हासी खुशी बिद्यालय हिडेका दुवै दिदी बहिनी हिलै हिलो भएको बाटोमा लडे पछि बिद्यालयको सट्टा अस्पताल पुग्नु परेको थियो ।
यी दुई दिदी बहिनी मात्र हैन भैरहवाको अधिकांश बाटोहरू समयमै निर्माण नहुदा दैनिक दुर्घटना बढ्दै गई रहेको छ । भैरहवाको मिलनचोक देखी बिमानास्थल सम्म जाने मूल सडकको बाटो नै हिलामय छ । पहिला सुगरमिल जाने खण्डमा अहिले हत्पत कुनै सवारी जान सोच्नै पर्छ । यस क्षेत्रमा हुने दैनिक दुर्घटनाले स्थानियलाई चिन्तित त बनाएकै छ उत्तिकै आक्रोशित पनि बनाएको छ ।
एशियाली बिकास बैंकको सहयोगमा क्षेत्रिय शहरी विकास आयोजना अन्र्तगत निर्माण भई रहेको बाटो समयमै नबन्दा स्थानियहरूको आक्रोश बढदै गएको छ । बिहिबार पनि दुर्घटनामा परि दुई दिदी बहिनी घाईते भए पछि उनिहरूको आक्रोशले बिरोधको रूप लियो र उनिहरूले बिमानास्थल जाने उक्त मूल बाटोमै बाँस लगाएर बाटो नै बन्द गरि दिए ।
“पटक पटक दुर्घटना बारे जानकारी गराएर क्षेत्रिय शहरी विकास आयोजनालाई बाटो मरम्मतको लागी आग्रह गर्यौ उनिहरूले नमानेको र दुर्घटना बढ्दै गए पछि बाटो नै बन्द गर्नु परेको हो । ” सिद्धार्थनगर नगर पालिका वडा नम्बर ४ का वडा अध्यक्ष मुक्तिनाथ यादव (भोला) ले भने ।बिमानास्थल जाने उक्त बाटोमा आयोजनाले करिब ६ महिना काम शुरु गरे पनि अहिले सम्म काम सकेको छैन । पिपरहिया चोक सम्म पक्की गरि सकिएको उक्त सडक खण्ड त्यस पछि साविकको शुगर मिल सम्म भने जानै नसक्ने अवश्थाको रहेको छ । बाटोको दुवै तर्फ खाल्डो खनेर राखेको छ जसले बर्खामा धेरै दुर्घटना बढाएको स्थानियहरूको भनाई छ । कतिपय अवश्थामा ब्यक्तिगत खर्चमा बाटो मरम्मत गरे पनि दुर्घटना कम नभए पछि क्षेत्रिय शहरी विकास आयोजनालाई दबाव दिन बाटो बन्द गर्नु परेको वडा अध्यक्ष यादवले बताए । जनताको सुरक्षा र बाटो निर्माण बारे प्रतिवद्धता नआए सम्म बन्द नगरिएको बाटो नखोल्ने भन्दै रूपन्देही प्रदेश नम्बर ३ का प्रदेश सभा सांसद सन्तोष पाण्डेले नै त्यसको अगुवाई गरेका थिए । सांसद पाण्डेकै नेतृत्वमा समूहले सिद्धार्थनगर नगरपालिकाको कार्यालय अगाडी केही बेर नाराबाजी समेत गरेका थिए ।
एकिकृत शहरी बिकास आयोजना अन्र्तगत भैरहवामा अहिले बिभिन्न बाटोहरू निर्माणाधिन अवश्थामा रहेका छन । एउटै ठेकेदार कमपनीले एकै पटक धेरै बाटोको निर्माण काम शुरु गरेको र निर्माण सामाग्री तथा कामदारको अभावमा निर्माणधिन धेरै बाटोहरू समयमै पुरा हुन सकेका छैनन् ।
यता क्षेत्रिय शहरी बिकास आयोजनाका आयोजना प्रमुख शैलेन्द्र श्रेष्ठले भने तत्काल त्यो बाटो निर्माण हुन नसक्ने बताएका छन । समयमै काम शुरु गरेको भए पनि स्थानियहरूले सहयोग नगरेको उनको भनाई छ । “स्थानियहरूले सडक मापदण्ड भित्र परेका संरचना नभत्काउदा समयमै काम गर्न सकिएन र बर्षा शुरु भयो । ” श्रेष्ठले भने “अहिले पनि बर्षा हुदै छ, बर्षा नसकिए सम्म बाटोको काम अगाडी बढाउन प्राविधिक कठिनाई छ ।”
निर्माण शुरु भएको उक्त बाटोमा ढल निर्माणको काम सकिएको छ भने बाटो निर्माणमा ढिला सुस्ती भएको हो । भैरहवाको मूख्य बाटोको रूपमा मानिएको यो बाटो बिशेष गरि ब्यापारीहरूको लाईफ लाईनको रूपमा रहेको छ । बाटो मरम्मत गर्ने प्रतिवद्धता आए पछि स्थानियहरूले गरेको अवरोध हटाएका थिए ।