खोज

तौलिहवा अस्पतालमा उपचारका लागी आउने बिरामीले समयमै ओपिडी नखुल्दा समस्या भोग्नु परेको गुनासो गरेका छन । बिहिबार अस्पतालको ओपिडी ११ बजे सम्म नखुले पछि अस्पताल व्यवस्थापन ठिक नभएको भन्दै बिरामीले गुनासो गरे । टुडेकर्मी बिहिबार बिहान पौने ११ बजे तौलिहवा अस्पताल पुग्दा ओपिडी कक्षमा ताला लागेको थियो । बिरामीहरु हातमा पुर्जी बोकेर यत्रतत्र बसेका थिए । आफुहरु दुई घण्टा अघि आएर ओपीडीको पुर्जी काटे पनि १० बजे खुल्नु पर्ने ओपिडी ११ बज्न लाग्दा समेत नखेलेको कपिलवस्तु नगरपालिका १ का दिनेश ज्ञवालीले गुनासो गरे । “सरकारले एका तिर कर बढाएको बढाई छ । अर्का तिर हामीले न्युनतम सुबिधा पाउने बिषयको पनि ग्यारेन्टी रहेन ।” उनले भने । अस्पतालमा लापरवाहीका कारण अधिकांस बिरामी अस्पतालमा उपचार गराउनु भन्दा भारत वा अन्यत्र जाने गरेको उनले बताए । उनी जस्तै उपचारका लागी आएका अर्का बिरामी नरेश उपाध्यायले अस्पतालको ओपीडीमा समयमा डाक्टर नबस्दा आफुहरुले समस्या भोगेको बताए । बिरामीलाई बस्नका लागी बनाईएको प्रतिक्षालय र ओपिडी कक्ष बाहिर फोहर र दुर्गन्धले आफुहरुलाई थप समस्यामा पारेको उनले गुनासो गरे । सो बारे बुझदा ओपीडिको डयुटी डाक्टर कात्यायनी पाण्डेयको रहेको र आवश्यकता अनुसार डाक्टर पुर्णलाई खटाईको जानकारी हुन आएको थियो । ओपिडीमा आउनु पर्ने डाक्टर कात्यायनी ईन्डोर कक्षका बिरामीको परिक्षणमा लागेकी थिईन भने डाक्टर पुर्ण अस्पतालमा भेटिएनन । सो बिषयमा फोन सम्पर्क मार्फत प्रतिक्रिया लिन खोज्दा अस्पतालका डाक्टर किशोर बन्जाडेले पहिले आफु व्यस्त रहेको र पछि फोन सम्पर्क गर्ने बताए पनि पछि फोन गर्दा फोन स्विच अफ गरिएको थियो ।
अस्तपतालमा भएको अस्त व्यस्तता र लापरवाहीको शिकार हुनेमा आम नागरिक सगै कपिलवस्तु नगरपालिकाका जनप्रतिनिधी पनि छन । तिन दिन अघि दुर्घटनामा घाईते भएकी कपिलवस्तु नगरपालिकाकी एक महिला सदस्यका लाई तत्काल उपचार गराउन पुगेका नगर उपप्रमुख लक्ष्मी गुप्ता र वडा अध्यक्ष दिरिप कुमार चौधरीले अस्पताल व्यवस्थापनमा चरम लापरवाही भएको भेटेका थिए । अस्पतालमा व्यवस्थापकिय कमजोडि सगै निशुल्क उपलब्ध गराउनु पर्ने औषधी समेत बिरामीहरु बाटै खरिद गराईएको भन्दै नगर कार्यपालिका बैठकमा अस्पताल व्यवस्थापनको बिरोध गरेका थिए । “वडा सदस्यलाई उपचार गराउन अस्पताल पुग्दा अस्पताल अस्त व्यस्त अवस्थामा देख्यौ । निशुल्क पाउनु पर्ने औषधी समेत अस्पतालमा छैन भन्दै बाहिर किन्न पठाएको जानकारी पायौ । ” उपप्रमुख गुप्ताले भनिन । अस्पताल व्यवस्थापन समितीले तत्काल सो बिषयमा कडाई नगरे आम नागरिकले सास्ती पाउने क्रम नघटने उपप्रमुख गुप्ताको तर्क थियो ।
पछिल्लो समय अस्पतालको सेवा प्रवाहमा आम नागरिकको जनगुनासो बढेको बताउदै आफुहरुले सेवा प्रवाहलाई व्यवस्थित बनाउन तत्कालै कडाई गर्ने अस्पताल व्यवस्थापन समितीका संयोजक समेत रहेका कपिलवस्तु नगरपालिकाका नगर प्रमुख किरण सिंहले बताए । अस्पतालमा औषधीको उपलब्धता नभएको बिषयमा भने उनले सरकार उपलब्ध गराउनु पर्ने निशुल्क औषधी समयमै उपलब्ध नगराउदा समस्या आएको आरोप लगाए । “सरकारले निशुल्क औषधी उपलब्ध नगराउदाँ समस्या आएको हो । नगरपालिकाले जिम्मा पाएको मध्यको औषधी उपलब्ध गराएका छौ । सबै औषधी नगरपालिका मार्फत उपलब्ध हुनु पर्ने भन्दै आम नागरिकमा भ्रम छर्ने कार्य सरासर गलत हो ।” सिंहले भने ।