खोज

ढिलो गरि तराईमा शितलहर सुरु भएको छ । विगतका बर्षहरूमा पुसको आरम्भबाटै शितलहर सुरु हुने गरेकोमा यो बर्ष दुई साता ढिलो गरि शितलहर सुरु हुँदा तराईका नागरिक चिसोबाट प्रभावित हुन थालेका छन । चिसोकै कारण यो बर्ष तराईमा दुईजनाको मृत्यु भैसकेको छ । तराईमा हुस्सुले चिसो बढाएको छ । चिसो बढेसंगै शितलहरले तराई र तामक्रम शून्यमा झर्दा हिमालका जनता प्रभावित भएका छन । यतिबेला चिसो मौसमका कारण तराई क्षेत्रका स्थानीय जनता सकसपूर्ण जीवन जिउन बाध्य छन् । तापक्रम घट्दै जाँदा यो समयमा यी क्षेत्रमा चिसो हावासँगै पानीको थोपा चुहिने र बाक्लो हुस्सु लाग्ने गर्छ । तापक्रम घट्ने क्रम भर्खर मात्र सुरु भएको छ । यो अवस्था बढ्दोक्रममा रहेकाले यी क्षेत्रका बासिन्दाले अझै चिसो मौसमको सामना गर्नुपर्ने निश्चित छ । प्रकृतिजन्य समस्या भएकाले यसलाई कसैले रोक्न तथा छेक्न त सक्दैन, तर पूर्वतयारी गर्न सकियो भने क्षति न्यूनीकरण गराउन भने अवश्य सकिन्छ । बेलैमा सचेत भएर चिसोबाट बच्ने र बचाउन सकिने विकल्पबारे सोच्नुपर्छ । यतिखेर पहाडी जिल्लाका तुलनामा तराईका जिल्लामा चिसोको समस्या धेरै छ । दुई दिनदेखि तराईमा बाक्लो हुस्सु र चिसो हावाले जनजीवन प्रभावित भएको छ । यतिबेला मौसम चिसो हुने समय भएपनि अकस्मात चिसोको मात्रा बढेको छ । चिसोले खासगरि गरिव र न्यून आय भएकाहरू बढी प्रभावित भएका छन । यो प्रत्येक बर्षको नियमित प्रकृया जस्तै बनेको छ । जाडोमा एकसरो कपडासमेत किन्न नसक्ने र रातीमा ओढ्ने ओछ्याउन नहुँदा दुःख पाएका नागरिक सबैभन्दा धेरै पीडामा छन् । यो समयमा उनीहरूलाई गास, बास र कपासको उचित प्रबन्ध गर्न कुनै कसर बाँकी राख्नु हुँदैन । असहाय नागरिकको संरक्षक राज्य भएका कारण उनीहरूलाई चिसोबाट जोगाउने अभिभारा पनि राज्यले बहन गर्नुपर्छ । सरकारसंगै मानव सेवामा लागेका धार्मिक, सामाजिक संघ संस्थाहरू र आर्थिकरूपले सम्पन्न नागरिकले पनि यतिबेला मानवता प्रदर्शन गरेर चिसो पीडितहरूलाई सघाउनुपर्छ ।

जाजरकोट भुकम्प प्रभावितहरू चिसोले सवैभन्दा बढी प्रताडित छन । सरकारले उनीहरूलाई कुनै मल्हम लगाउन सकेको छैन । सवैभन्दा बढी सुत्केरीहरू प्रभावित भैरहेका छन । उनीहरूलाई विभिन्न संघ संस्थाहरूले अस्थायी आवास बनाई दिएपनि दिर्घकालीन बासस्थानको व्यवस्थापन हुन सकेको छैन । यद्यपि हरेक वर्ष चिसो बढ्नु र त्यसबाट नागरिक प्रभावित हुनु नियति हो । तर, यसलाई वर्षैपिच्छे दोहोरिने समस्या हो भन्दै सरकारले नजरअन्दाज गर्नु हुँदैन । चिसो प्रभावतलाई कपडा वितरण गर्ने, दाउरा बालेर घर–गोठभित्र तातो बनाइराख्ने व्यवस्था गर्ने काममा स्थानीय सरकारले समेत सघाउनु पर्दछ । यो बेला निशुल्क दाउरा वितरणमा सरकारको ध्यान जाओस् । शीतलहर, हुस्सु, कुहिरो र चिसो हावाको समयमा रोगले समेत छिटो आक्रमण गर्छ । नागरिकले पनि सरकारको मात्र मुख नताकी आफ्नो स्वास्थ्यको हेरचाह र ध्यान दिनेतर्फ प्रयास गर्नुपर्छ । सरकारले चिसोबाट प्रभावितहरूलाई राहत दिने कुरामा ढिलाई नहोस् । चिसोबाट बढी प्रभावित क्षेत्र र समुदायका मानिसको सुरक्षा सरकारको समेत दायित्व हो । सरकारको प्राथमिकता थुपै्र छन तर तत्कालको सरकारको कर्तब्य र दायित्व भनेको नागरिकलाई चिसोबाट बचाउनु हो । स्थानीय पालिका र प्रदेश सरकारले पनि आ–आफ्नो क्षेत्रमा चिसो प्रभावितलाई दाउराको व्यवस्था गरोस् ।