खोज

विद्यार्थीहरु लामबद्ध उभिएका छन् । ठाउँठाउँमा मतपेटिका राखिएका छन् । मतपत्रमा छाप लगाउँदै विद्यार्थीहरुले मत हाल्दै गरेका देखिन्छन् । यो दाङ घोराहीको शान्ति निकेतन विद्यालयमा देखिएको दृश्य हो ।
विद्यार्थीहरुलाई निर्वाचन कार्यक्रमका बारेमा जानकारी दिने उद्देश्यले आयोजना गरिएको निर्वाचनमा विद्यार्थीहरुले क्याप्टेन र भाइस–क्याप्टेन चयन गरेका छन् । बुधबारदेखि सुरु भएको निर्वाचन कार्यक्रम अन्तर्गत शुक्रबार भएको मतदानमा कार्यक्रममा सहभागी विद्यार्थीहरुले आफ्नो प्रतिनिधि चयन गर्नुका साथै निर्वाचन प्रक्रियाका बारेमा जानकारी प्राप्त गरेको बताएका छन् । पुस्तकमा पढ्दा निर्वाचन कार्यक्रमबारे स्पष्ट हुन नसकेको बताउँदै विद्यार्थी साजना थारु कुमालले प्रयोगात्मक रुपमा निर्वाचन गर्दा सवै प्रकृया बुझेको प्रतिकृया दिईन् । “पुस्तकमा भएको ज्ञान भदा व्यवहारिक ज्ञान प्रभावकारी हुने रैछ” कुमालले भनिन् । निर्वाचनको बारेमा धेरै सुनेको बताउँदै कक्षा ६ की अर्की विद्यार्थी सुजाता पोख्रेलले स्वयं निर्वाचनमा सहभागी भएर यसलाई नजिकबाट बुझ्न पाएको बताईन् । “चुनाव आउँदा नेताहरु भोट माग्न आएको देखेकी थिएँ, किन घर घर आउँछन् भनेको त आज आफु सहभागि हुँदा प्रष्ट भयो” पोख्रेलले भनिन् । आज विद्यालयमा चुनावको कार्यक्रम राखेकोले सहभागी भएर जान्न पाएकोमा विद्यार्थी सुजाताले खुशि ब्यक्त गरीन् । “सुनेको र देखेको भन्दा आफै सहभागी हुँदा धेरै कुराहरु सिकिने रहेछ र बिर्सिदो पनि रहेनछ” पोख्रेलले भनिन् ।
उनीहरु त उदाहरण मात्रै हुन् । विद्यालयका १ सय ४६ जना विद्यार्थीहरु निर्वाचनमा सहभागी भएर धेरै कुरा सिकेका छन् । विद्यार्थीहरुले निर्वाचन प्रक्रिया मार्फत् ४ वटा क्याप्टेन र भाईस क्याप्टेन पदमा उम्मेदवारी दिएका ८ जना विद्यार्थीबाट २ जनालाई छानेका छन् । निर्वाचन प्रक्रियाका बारेमा जानकारी दिन गत वर्षदेखि निर्वाचन कार्यक्रम सञ्चालन गर्दै आएको विद्यालयका प्रिन्सिपल खगेश्वर पौडेलले जानकारी दिए । “यस कार्यक्रमबाट विद्यार्थीहरुलाई निर्वाचन प्रक्रियाका बारेमा बुझाउन सजिलो भएको छ” पौडेलले भने । विद्यालयका हरेक गतिविधिमा विद्यार्थीहरुलाई जोड्दै आइएको भन्दै प्रिन्सिपल पौडेलले निर्वाचन कार्यक्रमले २ वटा फाइदा दिएको बताए । एकातिर विद्यार्थीहरुले निर्वाचन प्रक्रियाका बारेमा बुझ्न सक्छन् भने अर्कोतर्फ क्याप्टेन र भाइस–क्याप्टेन मार्फत् विद्यालयका गतिविधिमा विद्यार्थीहरुको सहभागीता जुटाउन मद्दत पुग्ने पौडेल तर्क गर्छन् ।
विद्यालयका प्रबन्ध निर्देशक एवं मुख्य निर्वाचन अधिकृत सुनिल गौतमले मतदानवाट ममता बस्नेत क्याप्टेनमा र सुदन भण्डारी भाईस क्याप्टेनमा विजयी भएको जानकारी दिए । गौतमका अनुसार बस्नेतले ७८ मत ल्याएकी थिईन् भने उनका प्रतिद्वन्दी अस्मिता पौडेलले ५१, समिक्षा भण्डारीले १३ र मनिका पोख्रेलले २ मत ल्याएका थिए । त्यस्तै भाइस–क्याप्टेनमा विजयी भण्डारीले ५५ ल्याएर विजयी भए भने उनका प्रतिद्वन्दी समुद्र ओलीले ४०, प्रकाश खनालले ३३ र प्रदिप अधिकारीले १७ ल्याएको थिए । मतदान प्रकृयामा कक्षा ५ देखि १० सम्मका विद्यार्थीहरुले भाग लिएको भन्दै निर्वाचन अधिकृत गौतमले ९४.८० प्रतिशत मत खसेको बताए ।