खोज

साउन २३ गते बाट हुने ग्रेड वृद्धिको परिक्षामा रुपन्देहीमा ४ हजार बढीले गणित विषयमा ग्रेड वृद्धिको लागी फारम भरेका छन ।
एसईई परिक्षामा गणित बिषयमा प्राप्त भएको ग्रेड प्रति असन्तुष्टि जनाउदै अहिले सम्म ४ हजार ६८ जनाले फारम भरेको शिक्षा विकास तथा समन्वय इकाई रुपन्देहीले जनाएको छ । कार्यालयले भैरहवामा पत्रकारहरु सित कार्यालय बर्ष भरि गरेका कार्यहरुको समिक्षा कार्यक्रममा सो जानकारी गराएको हो । कार्यक्रममा कार्यालयका उप सचिव घनश्याम भुसालले रुपन्देहीमा परिक्षा दिएका जम्मा बिद्यार्थी संख्याको २५ प्रतिशत बढीले गणित बिषयमा मात्र ग्रेड वृद्धिको लागी फारम भरेको बताए । परिक्षा हुने अघिल्लो दिन साउन २२ गते सम्म परिक्षा ग्रेड वृद्धिको लागी फारम भर्न सक्ने भएको हुदा यो संख्या अझै बढ्न सक्ने उनले बताए ।
यस अघि सम्म जिल्ला सदरमुकाममा मात्र ग्रेड वृद्धिका परिक्षा हुने भए पनि यस बर्ष बुटवलमा पनि परिक्षा केन्द्र राखिएको भुसालले बताए । बुटवलमा ३ वटा र भैरहवामा ४ वटा गरि यस बर्ष ७ वटा परिक्षा केन्द्र तोकिएको उनले जानकारी गराए ।
यसै गरि शिक्षा विकास तथा समन्वय इकाई रुपन्देहीले आर्थिक बर्ष २०७४÷०७५ मा ९२ प्रतिशत रकम खर्च गरेको जनाएको छ । बिद्यालय क्षेत्र विकास कार्यक्रम अन्र्तगत प्राप्त भएको ३४ करोड ७८ लाख ४७ हजारको ९२ प्रतिशत अर्थात ३२ करोड ८ लाख ७९ हजार मात्र खर्च भएको इकाई प्रमुख दिवाकर भण्डारीले जानकारी दिए । राष्ट्रिय प्रारम्भिक कक्षा पढाई कार्यक्रम अन्र्तगत ५९ लाख ७७ हजार प्राप्त भएकोमा कार्यालयले ५३ लाख ९६ हजार मात्र खर्च गर्न सकेको थियो भने अनौपचरिक शिक्षा कार्यक्रम अन्र्तगत ५४ लाख ८९ हजार पाएकोमा ४६ लाख ६८ हजार मात्र खर्च गर्न सकेको इकाई प्रमुख भण्डारीले बताए । असारको अन्तिममा मात्र अख्तियारी प्राप्त भएको र शुरु नै नभएको शिर्षकमा समेत बजेट आएको हुदा लक्ष्य अनुसारको बजेट खर्च नभएको उनले स्पष्ट पारे ।
रुपन्देहीका स्थानिय तहमा शिक्षा कार्यालयको अधिकारहरु सरि सकेको कारण आफुहरुको भूमिका के हुने भन्ने बिषयमा समन्वय इकाईका कर्मचारीहरुमा अन्यौलता देखिएको छ । अहिले रुपन्देहीमा परिक्षा नियन्त्रण, शिक्षकहरुको अभिलेखीकरण, तलबी प्रतिवेदन पारीत, पेन्सनको सिफारीस लगायतको बिषयमा मात्र आफुहरुले काम गरि रहेको इकाई प्रमुख भण्डारीले जानकारी दिए ।
कार्यलयले दिएको तथ्यांक अनुसार रुपन्देहीमा प्राविधिक धार भएका ११ बिद्यालय, नमूना बिद्यालय ६, एनेक्स कार्यक्रम सञ्चालन भएको १, संस्कृत माध्यमिक बिद्यालय १, गुरुकुल आश्रम ४, मदरसा १ सय १८ सामुदायिक सिकाई केन्द्र ४७, खुला बिद्यालयमा १ वटा आधारभूत र १ वटा माध्यमिक, तथा प्रौढ बिद्यालयमा १ वटा आधारभूत र १ वटा माध्यमिक रहेको छ । यसै गरि रुपन्देहीमा रहेका २ लाख ६३ हजार ३ सय ६ जना बिद्यार्थीहरुको लागी बिभिन्न तहमा गरि २ हजार ८ सय ७४ जना शिक्षकहरु रहेका छन ।