खोज

लुम्बिनी प्रदेश सभाको बैठक आज बस्दै छ । प्रदेश सभा सचिव दुर्लभकुमार पुन मगरका अनुसार आज दिउँसो १ बजे बस्ने बैठकमा मुख्यमन्त्री कुलप्रसाद केसीले सभामा सम्बोधन गर्ने र दलका शीर्ष नेताहरुले शुभकामना दिने कार्यसूची रहेको छ ।

पोखरेलले राजीनामा दिएपछि चार दलीय गठबन्धनबाट साउन २८ गते मुख्यमन्त्रीमा नियुक्त भएका कुलप्रसाद केसीले तीस दिनभित्र प्रदेश सभाबाट विश्वासको मत लिनुपर्ने व्यवस्था छ । अधिवेशनमा मुख्यमन्त्री केसीले विश्वासको मत लिने तयारी गरेका छन् ।

नेपाली काग्रेस र माओवादी केन्द्रले नयाँ मन्त्री छनौट गर्न नसकेपछि मुख्यमन्त्री केसी विश्वासको मतपछि मात्रै मन्त्रिमण्डल विस्तार गर्ने मनस्थितीमा पुगेका छन् । मन्त्री बन्न नपाएको अवस्थामा सांसदहरु बिच्किनी डरले मुख्यमन्त्री केसी मन्त्रिमण्डल विस्तारमा ढिलाई गरिरहेका छन् ।

केसीलाई माधव पक्षले देला त विश्वासको मत ?

शंकर पोखरेल मुख्यमन्त्रीबाट बाहिरिहेसँगै नेकपा एमालेका दुुई जना लुम्बिनी प्रदेशसभा सदस्य बिष्णु पन्थी र रमा घर्ती माधव कुमार नेपाल समूहमा स्पष्ट रुपमा खुलेका थिए । विगतदेखि नै नेपाल समूहमा रहेको बताइए पनि शंकर पोखरेल नेतृत्वको लुम्बिनी प्रदेश सरकार रहँदासम्म उनीहरू स्पष्ट रूपमा खुलेका थिएनन् ।

एमाले नेतृत्वको प्रदेश सरकार परिवर्तनसँगै उनीहरु नेपाल समूहमा खुलेका हुन् । नेपाल निकट एमाले रुपन्देहीको शनिबारको बैठकमा सांसद पन्थी र घर्ती सहभागी भएका थिए । विपक्षी गठबन्धनले पन्थी र घर्तीलाई आफ्नो पक्षमा मतदान गराउने प्रयास गरिरहेको स्रोतको भनाई छ । स्रोतका अनुसार उनीहरु केन्द्रबाट आउने निर्देशनको पर्खाईमा रहेका छन् ।

यद्यपी यस विषयमा नेताहरु कुरा खोल्न चाहदैनन् । पन्थी कपिलवस्तुबाट एमालेको प्रत्यक्ष निर्वाचित सांसद हुने भने, घर्ती पाल्पाकी समानुपातिक सांसद हुन् ।

यसअघि नेकपा एमालेको सूर्य चिन्हबाट चुनाव जितेका अजयप्रताप शाहीलाई मुख्यमन्त्री केसीले विनाविभागिय मन्त्री बनाइसकेका छन्