खोज

लुम्बिनी प्रदेश सरकारका मुख्यमन्त्री कुलप्रसाद केसीले विश्वासको मत लिने तयारी थालेका छन् । मन्त्रीमण्डल विस्तार नगर्दै आफू बलियो बन्न उनले विश्वासको मत लिने तयारी गरेका हुन् ।

गठबन्धनमा रहेका सांसदहरु पछि प्रभावित भएर समस्या आउनसक्ने आंकलन गर्दै सरकारले यस्तो तयारी गरेको सरकार निकटका सांसदहरुको भनाइ छ। गठबन्धनभित्र मन्त्री बन्नेको सूची लामो भएपछि मन्त्रीको नामलाई अन्तिम रुप दिन सकस भैरहेको एक प्रदेश सांसदले बताए । उनका अनुसार कहिले माओवादी त कहिले एमालेमा रहेको भनी विवादमा आएकी सांसद विमला वली पनि माओवादी सांसदको विरोध गरेपछि मन्त्रीको सूचीमा पर्न सकिरहेकी छैनिन् ।

विवादका बीच मन्त्रीमण्डल बिस्तार गरी विश्वासको मत लिदा मन्त्रीमण्डलमा नपर्ने सांसदहरु यताउता हुनसक्ने मुख्यमन्त्री केसीको आंकलन हुनसक्ने ति सांसदले बताए । अहिले मुख्यमन्त्री सहित काग्रेसबाट १ जना, माओवादीबाट १ जना र जसपाबाट ३ जना र एमालेको सूर्य चिन्हबााट चुनाव लडेका १ जना गरी ६ जना मन्त्रीमण्डलमा सहभागी छन् ।

सरकारका प्रवक्ता कृष्णध्वज खड्काले सरकारले सुरुमै विश्वासको मत लिने तयारी गरेको पुष्टि गरे ।

प्रदेशमा संविधानको धारा १६८(२) बमोजिम गत साउन २८ गते मुख्यमन्त्रीमा नियुक्त भएका कुलप्रसाद केसीले तीस दिनभित्र प्रदेशसभाबाट विश्वासको मत लिनुपर्ने व्यवस्था छ ।

प्रदेश प्रमुख अमिक शेरचनले प्रदेशसभाको हिउँदे अधिवेशन भदौ १ गते बस्नेगरी आह्वान गरिसकेका छन् । प्रदेश प्रमुख शेरचनले संविधानको धारा १८३ को उपधारा १ बमोजिम प्रदेशसभाको अधिवेशन आह्वान गरेका हुन् ।