खोज

भारतको बिभिन्न ठाउँमा नेपाली चेलीहरुलाई बन्धक बनाई राखेको अवस्थामा ८ जनालाई उद्दार गरि स्वदेश फिर्ती गराईएको छ ।

उद्दार गरिएकामध्ये ५ जना किशोरी, २ जना महिला तथा १ जना पुरुष रहेका छन् ।

त्यसमध्ये ५ जनालाई परिवारको जिम्मा लगाईएको छ ।

एक जना नेपाली चेलीले एसएसबी क्याम्प सुनौलीमा आई भारतको लक्ष्मीनगरमा थप २ जना बहिनीहरु फँसेको र उनिहरु स्वदेश फिर्ता हुन चाहेको जानकारी गराएपछि उनिहरुको उद्दार गरिएको थियो ।

प्राप्त सूचनापछि बिभिन्न निकायह बीच आवश्यक परामर्शपछि स्थानीय प्रहरी, एसएसबी, एएचटियु टीम, सहायक जिल्ला मजिष्टे«ट नौतनवाँ, पुर्वाञ्चल ग्रामीण सेवा समिति, स्वःरक्षा टीम, शुभअवसर ग्राम नेपाल संयुक्त रुपमा उद्दारमा खटेका थिए ।
उक्त उद्दार ईलाका प्रहरी कार्यालय बेलहियाको समन्वयमा उद्धार कार्य सम्पन्न भएको हो ।
उद्धार टीमले जानकारी आएको ठाउँमा छापापछि थप २ जना नेपाली चेलीहरुलाई उद्धार गरेको थियो । यसै बीच छापा मार्ने क्रममा थप सूचना प्राप्त भई भारतको नौडिहवा मिश्रवलीे ठाउँबाट पनि थप ३ जना किशोरी र १ जना किशोरलाई उद्दार गरि नेपाल फर्काइएको छ ।

उद्धार पछि सबै जनालाई सुनौली कोटवाली पुलिसमा बुझाईएको थियो भने कोटवालीबाट आवश्यक प्रकृया पुरयाई ईलाका प्रहरी कार्यालय बेलहियामा जिम्मा दिइएको र पुनः  जिल्ला प्रहरी कार्यालय रुपन्देहीको समन्वयमा आवश्यक संरक्षणका लागि शुभअवसर ग्राम नेपालमा पठाईएको थियो । चेलीहरुको पिसिआर जाँच गर्दा ३ जनाको रिपोर्ट पोजिटिभ आएपछि उनिहरुलाई होटेल क्वारेन्टीनमा राखिएको थियो ।

यसै गरि संस्थाले ४ जना चेली, १ युवालाई उनिहरुको परिवारको जिम्मा लगाईसकेको जनाएको छ ।

होटेल क्वारेन्टीनमा बसिरहेका ३ जना चेलीहरुलाई समेत २०७८ जेष्ठ ११ गते पुनः पिसिआर जाँच गर्दा रिपोर्ट नेगेटिभ आईसकेकोले उनिहरुलाई पनि परिवारको जिम्मा लगाउन पहल थालिएको शुभअवसर ग्राम नेपाल भैरहवा शाखाका परियोजना अधिकृत सत्यनारायण यादवले जानकारी दिए ।

उद्दार गरिएका किशोरीहरुका अनुसार अझै पनि धेरै चेलीहरु फँसेको बताएका छन् ।

नेपाली किशोरीहरुलाई अरकेष्ट्रा डान्सरको रुपमा बन्धक बनाई राखेको अरकेष्टका संचालक विरुद्दमा कानुनी कारबाही प्रकृया समेत चलाईएको छ ।