खोज

महिलाको हत्या गरि हातका औलाहरु काटेर बिक्री गर्ने गिरोहमा संलग्न ८ जना पुर्पक्षका लागी कारागार चलान भएका छन ।

कपिलवस्तु अदालतको आदेशमा गिरोहमा संलग्न ८ जनालाई पुर्पक्षका लागि कपिलवस्तु कारागार चलान गरिएको हो ।

कपिलवस्तु जिल्लाको शुद्धोधन गाउँपालिका सँगै सिमा जोडिएको रुपन्देही जिल्लाको लुम्बिनी साँस्कृतीक नगरपालिका वडा नम्बर ५ मनहरपुर बुडन्तपुर स्थित माईती घरमा बस्दै आएकी ४२ बर्षिय सरजहाँ दर्जी चैत्र १२ गते राती एकाएक घरबाट हराएकी थिईन ।

प्रहरीले चैत्र २० गते कपिलवस्तु जिल्लाको शुद्धोधन गाउँपालिका वडा नम्बर ६ को बेतिया नदीमा बोरामा हालेर चार वटा ढुङ्गा समेत राखी फालिएको अवस्थाको उनको शव फेला पारेको थियो । बोरामा हालेर फालिएको महिलाको लासमा दुबै हातका बुढी औला बाहेकका आठ औंला काटिएको अवस्था थियो । अनुसन्धानको क्रममा सरजहाँ दर्जीलाई शुद्धोधन गाँउपालिका वडा नम्बर ६ बेतिया नदी छेउको चौरमा लगी गफ गरेर केहि बेर पछि हत्या गरेको खुल्न आएको थियो ।

उनलाई घटनास्थलमा बोलाउनेहरुमा कपिलवस्तु जिल्ला शुद्धोधन गाउँपालिका २ का अब्दुल कलाम मुसलमान र बेलाल अहमद मुसलमान थिए । चउरमा लगी गफगाफ गरेको दुई घण्टाकै अवधीमा दुबै जनाले मिलेर सरजहाँ दर्जीको घाटी थिचेर हत्या गरेको खुलेको थियो । हत्या पश्चात बेलालले उनका आठ औंला काटेको र दुबै जना मिली बोरामा हालेर बेती नदीमा फालेका थिए । अनुसन्धानका क्रममा हत्या गरि निज महिलाका हातका औलाहरु काटेर ल्याएमा प्रति औंला ७०/८० लाख मुल्य पर्ने भ्रमपुर्ण हल्लाको बिश्वासमा हत्या गरिएको प्रहरी अनुसन्धानले देखाएको छ ।

घटनामा संलग्न तान्त्रिक सहित ८ जनालाई प्रहरी नायब उपरिक्षक धर्मराज भण्डारी नेतृत्वको टोलीले नियन्त्रणमा लिएको थियो । प्रहरी नियन्त्रणमा आएकामा कलाम र बेलाल सगै तान्त्रिक पेशामा रहेका रुपन्देहीको शियारी गाँउपालिका ५ का जमिल अहमद देवान थिए । उनीहरु सँगै घटनामा संलग्न रहेका कपिलवस्तु जिल्लाको शुद्धोधन गाउँपालिका ५ शिवलवाका कृष्ण कुर्मी र राम हरक यादव तथा वडा नम्बर ४ का सत्य नारायण बढई, नवलपरासी पुर्वको मध्यबिन्दु नपा ७ का खेम बहादुर मल्ल र रुपन्देही जिल्लाको सैनामैना नगरपालिका १ बनकट्टाका ६७ बर्षिय कर्ण बहादुर सुनार रहेका छन ।

महिलाको हत्या पश्चात औला काटी बिभिन्न स्थानमा सप्लाई गर्ने तथा राख्ने व्यक्तिहरुको संगठित गिरोहमा संलग्न ८ जना लाई जिल्ला अदाालत कपिलवस्तुबाट संगठित अपराध, कर्तव्य ज्यान तथा मानव बेचबिखन तथा ओसार पसार कसुर मुद्दामा पुर्पक्षका लागी कारागार चलान गर्ने आदेश अनुरुप कपिलवस्तु कारागार चलान गरिएको प्रहरी उपरिक्षक नवराज अधिकारीले जानकारी दिए ।