खोज

कोरोना संक्रमणको दोस्रो लहरका कारण जारी निषेधाज्ञाका बीच बिरामीको उपचारका लागि रगतको अभाव हुदै आएको छ । तर बिरामीको उपचारका लागि आवश्यक पर्ने रगतको जोहो गर्न नेपाल स्वयंसेवी रक्तदाता समाज रुपन्देहीका समाजसेवी फिल्डस्तरमै निरन्तर खटिएका छन । पछिल्लो समय कोभिडका कारण प्रशासनले जारी गरेको निषेधाज्ञाका कारण डाईलासिस गर्नु पर्ने बिरामी, रक्त अल्पक्ताका बिरामी र गर्भवती महिलामा रगतको अभाव हुदै आएको छ ।

जारी निषेधाज्ञा र रगतको अभाव बिच कपिलवस्तु जिल्लाको बुद्धभुमि नगरपालिका वडा नम्बर ९ ईमलिया स्थित ग्लोबल डेरी प्रालि का सञ्चालक र कर्मचारीले २० युनिट रक्तदान गरेका छन । डेरीको आयोजनामा नेपाल स्वयंसेवी रक्तदाता समाज रुपन्देहीको सहयोग रक्तदान सम्पन्न गरिएको हो । समाजका केन्द्रिय सदस्य तथा रुपन्देही अध्यक्ष कृष्ण चौहान क्षेत्रि नेतृत्वमा दुई जना टेक्निशियन सहितको टोलीले कपिलवस्तुबाट रगत संकलन गरेको हो । जारी निषेधाज्ञा पछि पहिलो पटक समाजको टोलीले रुपन्देही जिल्ला बाहिर रक्तदान गराई रगत संकलन गरेको हो । टोलीले आईतबार रुपन्देहीको देवदहमा रगत संकलन गर्ने योजना रहेको छ ।

कोरोनाको संक्रमणका बिच रक्तदाताहरुले रगत दिन नसक्ने अवस्था आउदाँ रगतको अभाव हुन थाले पछि आफु र डेरीमा कार्यरत कर्मचारीले रक्तदान गरेको डेरीका सञ्चालक थानेश्वर न्यौपानेले जानकारी दिए । “रगतको अभाव टार्न रक्तदान गरेका छौ । त्यसै गरि अति आवश्यक पर्ने बिरामीको उपचारका लागि सहगोग होला कि भनेर उद्योगमा रहेका तिन वटा खाली अक्सिजनको सिलिण्डर समेत उपलब्ध गराएका छौ ।” सञ्चालक न्यौपानेले भने । निषेधाज्ञा पश्चात समाजले रक्तदानको आयोजना गरि बुटवलमा दैनिक २५÷३० युनिट रगत संकलन गर्दै आएको समाजका अध्यक्ष चौहान क्षेत्रिले जानकारी दिए । जारी निषेधाज्ञाका कारण पछिल्लो समय रगतको अभाव हुन थाले पछि दैनिक जसो ईमरजेन्सीमै रक्तदान गराईदै आएको उनले प्रष्ट पारे ।

समाजको नेतृत्वमा कोभिड संक्रमितका लागि आवश्यक पर्ने प्लाज्माको समेत व्यवस्थापन गरिदै आएको छ । “कोभिड संक्रमणमा परेकाको उपचारका लागि आवश्यक पर्ने प्लाज्मा चितवन र मकवानपुर सम्म पठाएका छौ ।” उनले भने । संक्रमणको बिच रगतको अभाव हुन नदिन स्वास्थ्य सर्तकतालाई मध्य नजर गरि सुरक्षाका साथ रक्तदान गरि दिन चौहानले रक्तदातालाई आग्रह गरे ।