खोज

बाग्लुङ, १७ जेठ । बाग्लुङको निसीखोला गाउँपालिकास्थित चार वटा विद्यालयमा शिक्षा नियमावली विपरीत विद्यालय व्यवस्थापन समिति गठन गरिएको छ । विद्यालय व्यवस्थापन समितिमा स्थानीय जनप्रतिनिधि बस्न नमिल्ने शिक्षा कार्यविधिको प्रावधान विपरीत जनप्रतिनिधिहरुकै नेतृत्वमा उक्त विद्यालयहरुमा व्यवस्थापन समिति गठन गरिएको हो ।

गाउँपालिकास्थित देविस्थान माध्यमिक विद्यालयमा वडा–१ का वडा सदस्य तेज बहादुर मल्लकै अध्यक्षतामा विद्यालय व्यवस्थापन समिति बनाइएको छ । यस्तै, जनहित आधारभुत विद्यालयमा तम बहादुर कुंवर र देउराली प्राथमिकमा रविन्द्र घर्तीको अध्यक्षतामा व्यवस्थापन समिति गठन गरिएको छ । कुंवर वडा–२ र घर्ती वडा नम्बर ६ का सदस्य हुन् ।

सबैभन्दा बेथिति त वडा–३ मा भएको छ । कक्षा १२ का विद्यार्थी समेत रहेका वडाध्यक्ष रमेशविक्रम शाही प्रभा मावि व्यवस्थापन समितिको अध्यक्ष बनेका छन् । गाउँपालिका शिक्षा कार्यविधि अनुसार विद्यालय व्यवस्थापन समितिमा जनप्रतिनिधिहरूलाई राख्न नपाइने व्यवस्था छ। विद्यालय शिक्षा सञ्चालन व्यवस्थापन तथा नियमन कार्यविधि–२०७७ अनुसार निर्वाचित जनप्रतिनिधि विद्यालय व्यवस्थापन समितिको अध्यक्ष वा सदस्य कुनैपनि पदमा हुन नसक्ने भनेर स्पष्टसँग खुलाइएको छ ।
शाही राष्ट्रिय जनमोर्चाबाट निर्वाचित वडाध्यक्ष हुन् ।
शक्तिको आडमा जनप्रतिनिधिहरुले कार्यविधिलाई धज्जी उडाउदै मनोमानी ढंगले आफू खुसी गर्दा विद्यालय व्यवस्थापन समितिमाथि नै प्रश्न उठेको छ । नियम विपरीत विद्यालय व्यवस्थापन समिति गठन हुँदासमेत गाउँपालिका शिक्षा शाखाका जिम्मेवार अधिकारी भने मुकदर्शक बनेका नेकपा एमाले निसीखोला गाउंपालिका अध्यक्ष भूमिराज घर्तीले बताए । अध्यक्ष घर्तीले सत्ता र शक्तिको आडमा नियमविपरित व्यवस्थापन समितिमा चुनिएका पदाधिकारीले तत्काल राजीनामा दिई विधि र कानुनी शासनको प्रत्याभूत गराउनुपर्ने बताए ।

कार्यविधि बिपरित नियम उल्लंघन गरेर जनप्रतिनिधि नै व्यवस्थापन समिति अध्यक्ष बनेको विषयमा शिक्षा शाखा प्रमुख जयराम पुनले उक्त विषयमा कमजोरी भएको स्वीकार गरे। उनले कानुन विपरीत भएको कुरालाई सच्याएर अगाडि बढ्ने बताए ।