खोज

रुपन्देहीको मायादेवी गाउँपालिकाका शिक्षकहरुले बालबालिकालाई उनिहरुको घरदैलोमै पुगेर पठन पाठनमा सहजीकरण शुरु गरेका छन् । कोभिड १९ का कारण बालबालिकाको पठन पाठनमा पुगेको क्षतिलाई कम गर्नका लागि गाउँपालिकाको पहलमा सिकाइ सहजीकरण शुरु भएको हो ।

गाउँपालिकाका शिक्षा प्रमुख नारायण लामिछानेले सरकारले जारी गरेको वैकल्पिक प्रणालीबाट विद्यार्थीको सिकाइ सहजीकरण निर्देशिका २०७७ अनुसार सिकाइ सहजीकरण भइहेको जानकारी दिए । उनका अनुसार शिक्षक परिचालन हुनु अघि पालिकाभित्र रहेको विद्यालयहरुका प्रधानाध्यापकहरुलाई निर्देशिकाको बिषयमा अभिमुखीकरण गरि तयारीको बिषयमा छलफल गरिएको थियो । शिक्षकहरुले फारम नै प्रयोग गरी प्रविधिमा पहुँचको बिषयमा तथ्यांक संकलन गरी विद्यार्थीहरुलाई बर्गीकरण गरिएको थियो । त्यसरी तथ्यांक लिदा अधिकांश बालबालिकाहरु अनलाइन, टेलिभिजन र रेडियोको पहुँचमा नदेखिएपछि समुदाय स्तर र विद्यालयमा सिकाइ केन्द्र बनाएर सहजीकरणको मोडेल लागु गरिएको लामिछानेको भनाइ छ ।

समुदायमा पुगेर बालबालिकालाई सहजीकरण गर्दा उनिहरुको सिकाइमा निकै सहयोग पुर्याएको जनचेना आधारभूत विद्यालयकी प्रधानाध्यापक तुल्सी सुवेदीले बताइन । लामो समयसम्म कापी किताब नसमाएका बालबालिकाले पठन पाठन शुरु गरेको र उनिहरुको टोलसम्म आफुहरु पुग्दा उनिहरु निकै खुसी हुने गरेको प्रधानाध्यापक सुवेदीले अनुभव सुनाइन । बालबालिका त खुसी भए नै उनले थपिन, यसले त अभिभावक चिन्ने र उनिहरुसँग कुराकानी गर्ने अवसर पनि मिल्यो । यस्तो अवस्थामा पनि आफ्ना सन्तानको शिक्षाका लागि घरदैलोसम्म आउनुभो भन्दै धन्यवाद दिनुहुन्छ अभिभावकको भनाइलाई उधृत गर्दै सुवेदीले थपिन । उनले शिक्षकहरुको समुह बनाई दुरी कायम गरी समुदायमा सहजीकरण गर्ने र दिन तोकेर बालबालिकालाई पनि कक्षागत रुपमा पालो लगाई विद्यालयमा बोलाउने गरिएको बताइन ।

सुण्डी माविका प्रधानाध्यापक सतिशचन्द्रमणि त्रिपाठीले समुदायमा खोलिएको सिकाइ केन्द्रले बालबालिका र अभिभावक खुसी देखिएको प्रतिक्रिया दिए । हामीले ८ ठाउँमा सिकाइ केन्द्र खोलेका छौं त्रिपाठीले भने, त्यहाँ सामुदायिक मात्रै नभई संस्थागत विद्यालयका बालबालिका पनि सहभागी भइरहेका छन् । उनले यसले शिक्षक र बालबालिका मात्रै नभई अभिभावक र समुदायसँग पनि परिचित गराएको बताए ।

पालिकाका शिक्षा प्रमुख नारायण लामिछानेले शिक्षक परिचालनले पालिकामा अहिले पठन पाठनको वातावरण वनेको बताए ।

गाउँपालिकाका प्रमुख धु्रवनारायण चौधरीले बैकल्पिक सिकाइ सहजीकरणको समुदायबाट सकारात्मक प्रतिक्रिया आएको बताए । उनले सामुदायिक विद्यालयले शुरु गरेपछि यो कार्यक्रम संस्थागत विद्यालयहरुले पनि शुरु गर्ने तयारी गरेको बताए । संघीय सरकारले जारी गरेको निर्देशिका अनुसार शिक्षक र अभिभावकको छलफलबाट गरिएको निर्णय भएको बताउँदै उनले पालिकाबाट सहजीकरणको अनुगमन गर्न लागिएको बताए । हामीले विद्यालयहरुलाई पालिकामा रिर्पोटिङ गर्ने सयन्त्रसँग पनि जोडेको छौं प्रमुख चौधरीले भने, अनुगमन पनि शुरु गर्ने तयारीमा छौं ।

सरकारले गत जेष्ठ १८ गते वैकल्पिक प्रणालीबाट विद्यार्थीको सिकाइ सहजीकरण निर्देशिका २०७७ जारी गरी असार १ गते देखि बालबालिकालाई सहजीकरण गर्न भनिसकेको छ । उक्त निर्देशिकामा स्थानीय तह र विद्यालयको पहलमा बढीमा आठ देखि दश जनासम्मको समूह रहने गरी स्थानीय रूपमा सिकाइ केन्द्र वा विद्यालयमा एक आपसमा भौतिक दूरी कायम हुने गरी बसाइ व्यवस्था मिलाई सिक्ने सिकाउने व्यवस्था गर्ने उल्लेख छ । निर्देशिकामा त्यस्ता सिकाइ केन्द्रहरु समुदाय र विद्यालयमा संचालन गर्न सकिने र त्यसको व्यवस्थापन विद्यालय र स्थानीय तहले गर्ने भनेको छ ।