खोज

भर्खरै व्यवसाय सुरु गरेका युवा दिपक काफ्लेले आफुजस्तै उमेरका युवाहरुलाई भेला गरे । ‘हामीले पनि तुलसीपुरको पहिचान वनाउनका लागि केही गरौ’ माइन्युटमा होइन मनले उनीहरुले सहमती जनाए । तुलसीपुरको वसपार्क लकडाउनमा पनि फोहोर थियो । धेरै मान्छे त्यसलाई नाँघेर हिड्ने गर्थे । आहा तुलसीपुरका सदस्यहरुले वसपार्क क्षेत्रलाई आहा वनाउने अठोटका साथमा काम सुरु गरेका छन् ।

‘तुलसीपुर उपमहानगरपालिकाले विभिन्न प्राविधिक पक्षमा सहयोग ग¥यो अरु काम हामीले ग¥यौ’ खाल्डा पुर्दै गरेकी समुहकी सदस्य अस्मिता भण्डारीले भनिन् । वसपार्कमा गरेको कामले उनीहरुलाई उर्जा दियो । घर परिवार र समाजका सबैले उनीहरुको कामको प्रशंसा गरे । तुलसीपुर वजार क्षेत्रमा रहेका खाल्डाहरु पुर्ने अभियान सञ्चालन गर्ने योजना वनाए । ‘हामीजस्तै युवाहरुले स्मार्ट सिटीका खाल्डा भनेर सामाजिक सञ्जालमा सरकारलाई उडाएको पायौ तर हामी भने यसलाई कसरी राम्रो गराउन सकिन्छ भन्नेमा आफ्नो भुमिका खोज्दै गयौ’ उनले भनीन् ।

उपमहानगरपालिकाले उनीहरुलाई ग्राभेल र गाडी उपलब्ध गरायो पछि उनीहरुले वेल्चा र गैति चलाएर वजार भरीका खाल्डा पुरेका छन् । जुनसुकै काममा पनि उनीहरुलाई सबैको सहयोग मिल्यो । उनीहरुको कामलाई सवैले प्रशंसा गर्दा उनीहरुलाई पनि सामाजीक कामगर्ने हौसला मिलेको काफ्लेले बताए । बजारका खाल्डाखुल्डी भरेपछि आहा तुलसीपुरका लागि उनीहरुको ध्यान अब जथाभावि हुने फोहोरका साथै वजारको हरियाली बढाउनेमा केन्द्रीत रहेको छ । ‘भएको हरियालीलाई जोगाउने र नभएको ठाउँमा वृक्षारोपण गर्ने तयारी गरिरहेका छौ’ आहा तुलसीपुरसँग एकीकृत रुपमै काम अगाडि वढाउन लागेको फेमिना ग्रुपकी अस्मिता आचार्यले भनिन् । उनले समान उद्देश्य भएका दुवै अभियानलाई एकीकृत गरेर लैजान लागेको पनि वताइन् ।

आहा तुलसीपुरका सदस्यहरु सामुहिक भेला पनि हुदैनन्, औपचारिकताका लागि माइन्युट पनि हुँदैन । सामाजिक सञ्जालमा ग्रुप वनाएर के गर्ने भन्ने उनीहरुका विचमा ‘भर्चुअल’ बैठक हुन्छ । त्यहीँ एजेण्डा वनाउँछन् र निर्णय पनि त्यही हुन्छ । अर्को दिन सबै फिल्डमा काम अगाडि वढाउने तयारी सहित आएका हुन्छन् । समुहमा अहिले विभिन्न पेशा व्यवसायमा लागेका युवाका साथै पढ्दै गरेका विद्यार्थी गरी २० जना रहेका छन् । यो संख्या वढ्दै पनि गएको छ । “सवै काम सरकारको वाटो हेरेर हुदैन र सरकारको आलोचना गर्नुभन्दा सचेत युवाको हैसियतले केही गरौ भनेर सुरु गरेका हौ” समुहका सदस्य दिपकले भने । यस क्षेत्रका सबै युवाहरुलाई जोडेर लैजाने योजना रहेको दिपकले बताए ।

अहिले उनीहरुले तुलसीपुरको ङ लाइनमा सडक हरियालीको लागि तयारी गरिरहेका छन् । सडक सुन्दर देखिने विरुवाको माग समेत गरेका छन् । स्थानीय सरकारले विभिन्न निकायसँग समन्वय गरेर विरुवा उपलब्ध गराउने समेत भइसकेको छ । उनीहरुलाई सबैभन्दा वढि चिन्ता दैनिक बजारमा हुने फोहोरको रहेको छ । “ठूलो ठूलो पसल खोलेकाहरुले समेत पसल अगाडी डस्टविन राख्दैनन्, प्रत्येक पसल अगाडि अनिवार्य डस्टविन राख्ने व्यवस्था गर्नका लागि स्थानीय सरकारसँग समन्वय गर्दैछौ” अस्मिताले भनिन् । पसलेहरुमा चेतना भयो भने वजार प्रदुषणमुक्त हुने उनीहरुको ठम्याई छ । डस्टविन नराख्ने र फोहोर गर्ने व्यवसायीलाई कारबाही गर्न सकियो भने वजार त्यसै सुन्दर देखिन्छ भन्ने उनीहरुलाई लागेको छ । फेमिना ग्रुपका प्रत्येक सदस्यलाई तुलसीपुर आउँदा हरेकले नागरीकले “आहा भनोस्” भन्ने दुइ शब्दको सपना छ ।