खोज

दाङ, २३ वैशाख

नेपाली भाषालाई बचाउने सबैको दायित्व भएको नेपाल संस्कृत विश्वविद्यालयका उपकुलपति डा. यादव प्रकाश लामिछानेले बताएका छन् । राप्ती साहित्य परिषदको आयोजनामा ४६ औ स्थापना दिवसका अवसरमा उनले अब पछिल्लो पुस्ताले भाषा जोगाउनुपर्ने बताए । पहिलेका साहित्यकारले नेपाली साहित्यलाई जरुवाको पानी जस्तो सजिलो तरिकाले प्रयोग गर्न सक्ने बनाएका थिए भन्दै अहिलेका साहित्यकारले भाषालाई जसरी प्रयोग गरे पनि बुझ्ने त हो भनी बिगारेको बताए ।

पुराना साहित्यकारले झर्रोवादी साहित्यलाई व्यापक बनाएकोले सरल र सरस भएको थियो । त्यसको संरक्षण गर्न अहिले पुस्ता लाग्नुपर्ने उनको भनाई थियो । उनले भने, “अहिले नेपाली भाषा भाँचिएको छ, टुक्रिएको छ, बुझे त भैहाल्यो नि भन्ने बानीको बिकास भएको छ, त्यसैले गर्दा नेपाली भाषाको मिठास हराउँदै गएको छ । ” “नेपाली भाषामा शब्दको खानी रहेको र आगन्तुक शब्द मिसाउन हुँदैन,”उनले भने । १०१३ सालका जसरी झर्रोवादी आन्दोलनले भाषालाई संरक्षण गरेको थियो त्यो अहिले हराउदै गएको उनले बताए । अहिलेको पुस्ताले क्रम भंग गरेर भाषाको संरचना तयार गर्न नहुने र भाषा बचाउनतिर लाग्नुपर्ने उनको धारणा थियो ।

सोही कार्यक्रममा वरिष्ठ साहित्यकार नारायणप्रसाद शर्माले साहित्यकारका रचनाले देशको बेथितीका बारेका खवरदारी गर्नुपर्ने बताए । साहित्यको माध्यम सशक्त हुने भएकाले भुगोल बचाउनका लागि होस् वा संस्कार संस्कृति जोगाउनतिर लाग्न उनले आग्रह गरे । कलमको शक्ति बलियो हुन्छ, यसले खवरदारी गर्नुपर्नेमा उनले जोड दिए ।

कार्यक्रममा साहित्यकार उत्तमकृष्ण मजगैया, पद्मप्रसाद शर्मा, पुरुषोत्तम खनाल, जीतबहादुर शाह, जगदिश आचार्य लगायतले साहित्यले समाजको प्रतिनिधित्व गर्ने बताए । राप्ती साहित्य परिषदका केन्द्रीय अध्यक्ष टिकाराम उदासीको अध्यक्षतामा भएको कार्यक्रममा सबिक राप्ती अञ्चल भित्रका विभिन्न विधाका ४३ जना साहित्यकार, साहित्यिक संस्था र कृतिलाइ पुरस्कार र सम्मान गरिएको थियो । सोही कार्यक्रममा लुम्बिनी प्रदेश भित्रका १० जना साहित्यकारको बीचमा गजल वाचन प्रतियोगिता भएको थियो । जसमध्ये पाँचजना स्रष्टालाई पुरस्कृत गरिएको थियो ।

सो अवसरमा राप्ती साहित्य परिषदको मुखपत्र अन्तरध्वनी पनि विमोचन गरिएको थियो । राप्तीको सबैभन्दा पुरानो साहित्यिक संस्थाले लुम्बिनी प्रदेशको छ जिल्लामा शाखा बिस्तार गरेर बिभिन्न साहित्यिक कार्यक्रम गर्दै आएको छ । कार्यक्रमको सहजीकरण महासचिव रमेश सुवेदी गरेका थिए ।