खोज

यूवा अवस्थामै व्यवसायिक तरकारी खेतीमा लागेका झिमरुक गाउँपालिका–४ बांगेमरोठ बौडा प्यूठानका प्रेम पुन गाउँमै लाखौँका मालिक बनेका छन् । दश वर्ष अघिदेखि उनले बांगेफेदी बजार नजिक अठ्ठाइसेमा व्यवसायिक तरकारीखेती गरेका छन् । मौसमी तथा बेमौसमी खेती गरेर उनले वार्षिक करिव पाँचलाख रुपैयाँ बचत गर्ने गर्छन् ।
नौ रोपनी क्षेत्रफल जग्गामा पुनले तरकारी लगाएका छन् । हिजोआज उनको खेतमा खुर्सानी, भेडे खुर्सानी, टमाटर, भान्टा फलेका छन् । यसबाहेक बन्दा, काउली, आलु समेत उनले लगाउने गर्छन् । लामोसमयदेखि निरन्तर तरकारी खेतीमा लागेर उनी यस क्षेत्रकै नमुना यूवा किसानको रुपमा आफ्नो पहिचान बनाएका छन् । उत्पादित तरकारी अर्गानिक र ताजा हुने भएकाले धेरै ग्राहकहरु घरमै पुगेर तरकारी खरिद गर्ने गर्छन् । ‘विक्री गर्न समस्या छैन्’,पुनले भने,‘उत्पादन मात्र गर्नुपर्छ । बजारको चिन्तै हुँदैन् ।’ स्थानीय बांगेफेदी बजार सहित मच्छि, सौतामारे, अर्घाखाँचीको गोखुंगामा तरकारी पुग्ने गरेको उनले सुनाए ।
श्रीमती पवित्रा पुनले उनलाई सघाउने गर्छिन् । पुन दम्पतीको तरकारीबाट भएको सफलता देखेर गाउँलेहरु दंग पर्ने गरेका छन् । मेहनत गर्नसके घरमै राम्रो आम्दानीको प्रतिफल लिनसकिने उनीहरुले धेरै यूवाहरुलाई प्रेरणा दिएका छन् । स्नातक तह पढ्दै गरेका पुनले पढाइलाई निरन्तरता दिन नसकेपनि आफ्नो कर्मबाट खुसी भएको अनुभव सनाउछन् । ‘पढ्दापढ्दै तरकारी खेतीमा लागियो’,उनले भने,‘अझ धेरै क्षेत्रफल जग्गामा खेती विस्तार गर्ने सोँच बनाएको छु ।’ आफ्नो जीवन परिवर्तन गर्न व्यवसायिक तरकारी खेतीले धेरै मद्दत पुगेको उनले सुनाए । सँगैका धेरैजसो साथीहरु घरखर्च धान्नकै लागि वैदेशिक रोजगारमा पुगेको सुनाउदै उनले फर्केर व्यवसायिक खेतीमा लाग्न सुझाव दिएका छन् ।
३१ वर्षिय पुनले खेतमा टनेल बनाएर तरकारी खेती गरेका छन् । खेत नजिकै प्रशस्त पानी भएकाले पनि उनलाई सिंचाइ गर्न समस्या छैन् । जिल्ला कृषि विकास कार्यालय प्यूठानले दश प्रतिशत लगानीमा टनेल खरिदमा अनुदान दिएको उनले जानकारी गराए । पुनले तरकारीसँगै कुखुरापालन समेत गरेका छन् ।
जन्मघर बांगेमरोठको बौँडा भएपनि विगत दश वर्षदेखि उनी अठ्ठाइसेमा बसाई सरेका छन् । बेसी झरेदेखि नै पुन व्यवसायिक तरकारी खेतीमा लागेका हुन् । पुन दम्पतीको दैनिक विहान उठेदेखि साँझसम्म तरकारी बारीमै वित्ने गरेको छ । उर्जाशिल समय व्यवसायिक तरकारी खेतीमै विताएको अनुभव सुनाउँदै उनले बाकी जीवन यसैमा विताउने योजना बनाएका छन् । व्यवसायिक रुपमा लागेका किसानहरुलाई हौसला दिनेगरी स्थानीय सरकारले कार्यक्रमहरु ल्याउन पुनले सुझाव दिएका छन् ।