काठमाडौँ ।
ऊर्जा, जलस्रोत तथा सिँचाइमन्त्री दीपक खड्काले आज रसियाका राजदूत एलेक्सी नोभिकभसँग शिष्टाचार भेटवार्ता गरेका छन्। मन्त्रालयमा भएको यस भेटमा नेपाल र रसियाबीचका द्विपक्षीय आपसी हित र सहकार्यका विषयमा छलफल भएको थियो।
मन्त्री खड्काले रसियाली सरकारले नेपालको जनशक्ति विकासमा पुर्याएको योगदान र सहयोगप्रति आभार प्रकट गर्दै त्यसका लागि धन्यवाद दिएका छन्। उनले पनौती जलविद्युत् आयोजनाको निर्माणमा शोभियत सरकारको वित्तीय सहयोगको स्मरण गर्दै, नेपालको विद्युत् उत्पादनको लक्ष्य पूरा गर्न रसियाको सहयोगको आवश्यकता व्यक्त गरेका छन्।
मन्त्री खड्काले नेपालले सन् २०३५ सम्म २८ हजार ५०० मेगावाट विद्युत् उत्पादन गर्ने महत्वाकांक्षी लक्ष्य लिएको उल्लेख गर्दै, यसलाई पुरा गर्न रसियाली सरकारको सहकार्य महत्त्वपूर्ण हुने बताएका छन्। उनले नेपालका ऊर्जा भण्डारण, स्मार्ट ग्रीड, प्रसारण लाइन र हरित ऊर्जा क्षेत्रमा लगानीको वातावरण मिलाउन रसियाली कम्पनीलाई आग्रह गरेका छन्।
राजदूत एलेक्सी नोभिकभले पनि नेपालका ऊर्जा र जलविद्युत् क्षेत्रमा रसियाली लगानीकर्ताहरूको चासो र इच्छाशक्ति रहेको जानकारी दिए। उनले रसियामा आयोजना हुने विभिन्न अन्तर्राष्ट्रिय मञ्चहरूमा मन्त्री खड्कालाई सहभागी हुन आमन्त्रण गरेका छन्। ती मञ्चहरूमा सेन्ट पिटर्सवर्ग इन्टरनेसनल इकोनोमी फोरम, नेभेस्की इन्टरनेशनल इकोलोजिकल कंग्रेस र रसियन इनर्जी वीकको उल्लेख गरिएको छ।
यस भेटले नेपाल र रसियाबीच ऊर्जा र जलस्रोत क्षेत्रमा थप सहकार्यको सम्भावना प्रशस्त बनाएको छ।
