खोज

दिउँसोको १ बजेको थियो । ‘हाप छुट्टी’ को समय । सवै विद्यार्थी तितरवितर थिए । कोही भलिवल खेल्दै थिए । कतिपय तीन÷चार जनाको समूह बनाएर गफिदै थिए । एक घण्टाको समय विद्यार्थीका लागि ‘रिफ्रेस’ गर्न छुट्टाइएको हुन्छ । तर, कक्षा १० मा अध्ययनरत चारजना छात्राहरु एक घण्टाको पुरै समय यत्तिकै खेल फाल्दैनन् । चिसोको कारण उनीहरु बाहिरको प्राङगणमा बेन्च राखेर विज्ञान विषयको गृहकार्य गरिरहेका देखिन्थे । नजिकै विद्यार्थीहरु होहोल्ला गरेपनि उनीहरुलाई त्यसले कुनै असर गरेको थिएन ।
झिमरुक गाउँपालिका–४ बांगेफेदी स्थित लक्ष्मी माध्यमिक विद्यालयमा कक्षा १० मा पढ्ने चारजना छात्राहरुलाई खेल्नेभन्दा पनि पढ्नमै धेरै चिन्तित हुन्छन् । माध्यमिक शिक्षा परीक्षा(एसइइ) नजिकिँदै छ । यसैको तयारीमा उनीहरु जुटेका हुन् । एउटै उमेरका भगवता विक, रञ्जु पौडेल, अनिता जिसी र गिता रोका सँगै बसेर खाली समयमा पनि पढिरहेका हुन्छन् । थोरै समयमात्र उनीहरु मनोरञ्जनका लागि छुट्याएका हुन्छन् । धेरै समय पढाइकै तयारीमा लाग्छन् । कक्षा नौ बाट दशमा जाँदा तेस्रो स्थानमा आएकी रञ्जु पौडेल एसइइमा ‘ए’ ग्रेड ल्याउने लक्ष्यका साथ तयारीमा जुटेकी छिन् । ‘पोहोरसाल ७७ प्रतिशत आएको थियो’,उनी भन्छिन्,‘अतिरिक्त कक्षा पनि लिएकी छु ।’
कक्षा १० मा २८ छात्रा र १६ छात्र गरी ४४ जना विद्यार्थी अध्ययनरत रहेको प्रधानाध्यापक कर्ण बहादुर जिसीले जानकारी गराए । ‘चारजना छात्राहरु अनुशासित विद्यार्थीमा पर्छन्’,जिसीले भने,‘सवै विद्यार्थी अनुशासित छन् । तर, उनीहरु अझ राम्रा विद्यार्थीमा पर्छन् ।’ एसइइमा जिल्लामै राम्रो अंक ल्याउने उद्देश्यका साथ विद्यालयले कक्षा १० का विद्यार्थीलाई ‘आवशिय’ रुपमा राखेको उनले जानकारी गराए । यस विद्यालयमा झिमरुक गाउँपालिका वडा नम्वर ४ मा रहेका बांगे, काउछे, टिमिलडाँडा, हरिय, गोलखाडा, सुमन्तेकाना, बौडा, उर्लेनी लगाएत गाउँबाट विद्यार्थीहरु अध्ययन गर्दछन् । बालविकास सहित ३ सय २१ विद्यार्थीहरु अध्ययनरत रहेको प्रधानाध्यापक जिसीले बताए । मावीमा शुन्य दरवन्दीमै संचालन भइरहेको उक्त विद्यालयले ०६९ सालको एसएलसी परीक्षामा जिल्लामै प्रथम स्थान ल्याएको थियो । ०७४ सालको एसइइमा चौथो स्थान आएको विद्यालय प्रशासनले जनाएको छ ।