खोज

श्रम रोजगार तथा सामाजिक सुरक्षा मन्त्रालयले प्रदेशमा रहेका ६ वटा श्रम तथा रोजगार कार्यालयलाई अधिकार प्रत्यायोजन गरेको छ । मन्त्रालयले सूचना जारी गरी प्रदेशस्तरका कार्यालयलाई दिइएको अधिकारबारे जानकारी गराएको हो ।
श्रम तथा व्यवसाय जन्य सुरक्षा विभाग अन्तर्गतका धनगढी, सुर्खेत, बुटवल, पोखरा, जनकपुर र विराटनगरमा रहेका श्रम तथा रोजगार कार्यालयहरुलाई राजपत्रमा प्रकाशित गरी अधिकार प्रत्यायोजन गरिएको छ । वैदेशिक रोजगार ऐन, २०६४ को दफा १५ बमोजिम वैदेशिक रोजगारमा कामदार पठाउन निश्चित संख्यामा माग निर्धारण गरी पूर्व स्वीकृतिका लागि निवेदन लिने र पूर्व स्वीकृति दिन सक्ने छन् ।
व्यक्तिगत श्रम स्वीकृति पनि प्रदेश कार्यालयहरुले नै दिन सक्ने छन् । यस्तै म्यानपावर कम्पनीका शाखा कार्यालयको अनुगमन र वैदेशिक रोजगार ऐन कार्यन्वयन भए नभएको अनुगमन गर्ने अधिकार पनि प्रदेशमा रहने श्रम तथा रोजगार कार्यालयहरुलाई दिइएको छ । म्यानपावर व्यवसायीले विज्ञापन गरे नगरेको अनुगमन गरी तथ्य बुझ्ने तथा तोकिएको संख्यामा श्रम स्वीकृतिको स्टिकर दिने अधिकार प्रदेश कार्यालयलाई दिइएको छ ।
आजदेखि प्रदेश नम्बर २ को जनकपुर र प्रदेश नम्बर ५ को बुटवलबाट समेत श्रम तथा रोजगारसँग सम्बन्धी कामहरु हुने भनिएको छ । अन्य प्रदेशका कार्यालयबाट भने केही समय लाग्ने र तयारी भइरहेको मन्त्रालयले जनाएको छ । तत्कालका लागि पुनः श्रम स्वीकृति, म्यानपावर कम्पनी तथा अभिमूखीकरण तालिम दिने संस्थाहरुको अनुगमन र नियमन गर्ने, वैदेशिक रोजगारी सम्बन्धी सूचना जानकारी दिने र गुनासो सुनुवाई गरी सेवा प्रवाहलाई सहजीकरण गर्ने जस्ता काम हुने छन् ।
श्रम तथा रोजगार कार्यालय बुटवलले आइतबार (आज) दिउँसोदेखि सेवा प्रारम्भ गर्ने तयारी भईरहेको कार्यालय प्रमुख उमेश शर्माले जानकारी दिए । हामी तयारीमा छौं बुटवल टुडेसँग कुराकानी गर्दै शर्माले भने सेवा शुरु गर्नका लागि सिडिओ साप सँग पनि कुराकानी भयो दिउँसो बाह्, एक बजे ओपनिङ गछौं ।
उनका अनुसार श्रम स्वीकृतिको काम शुरु गर्नका लागि कार्यालयले सामग्री व्यवस्थापन र फास्ट ईन्टरनेट जडानको काम गरिरहेको छ । प्रमुख शर्माका अनुसार तत्काल काम शुरु गर्नलाई कार्यालयलाई भाषाविदको आवश्यक परेकोमा उक्त कर्मचारी पनि केन्द्रबाट पठाएको जानकारी आफुले पाएको बताए ।
श्रम तथा रोजगार कार्यालय, बुटवलका लागि लागि १४ जना कर्मचारीको दरबन्दी छ । दरबन्दीका कर्मचारीमध्ये अधिकांश बुटवल आइसकेको कार्यालयका मेकानिकल ईन्जिनियर पर्वत श्रेष्ठले बताए । तत्कालका आफुहरु कार्यालयलाई चाहिने भौतिक संरचना र प्राविधिक तयारीमा जुटेको जानकारी दिए ।
बुटवलबाट श्रम स्वीकृतीको काम शुरु भएसँगै यस क्षेत्रका बैदेशिक रोजगारका लागि जानेहरुले सरकारबाट लिने स्वीकृत लिन काठमाडौ जानुपर्ने समस्याको अन्त्य हुने भएको छ ।