खोज

प्रदेश नम्बर ५ का सामाजिक बिकास समितिका संयोजक तथा कपिलवस्तुका प्रदेशसभा सदस्य दृगनारायण पाण्डेयले जिल्लाका दक्षिणी क्षेत्रका स्थानीय तहले महिला सहितको लक्षित बर्गको बजेट अनुरूपका कार्यक्रम नगरेको आरोप लगाएका छन ।
जिल्ला समन्वय समिति कपिलवस्तुको आयोजनामा तौलिहवामा सम्पन्न लैङ्गिक हिंसा बिरुद्धको १६ दिवसिय अभियानका अवसरमा आयोजित अन्तरक्रियालाई सम्बोधन गर्दै संयोजक पाण्डेयले सो बिचार व्यक्त गरे ।
उनले लैङ्गिक हिंसा बिरुद्धका सचेतना कार्यक्रम र महिला अधिकारका सचेतना कार्यक्रमलाई लक्षित बर्ग सम्म पुग्ने गरि ग्रामिणस्तरमा आयोजना गर्नु पर्नेमा जोड दिए । स्थानीयतहले दक्षिणी क्षेत्रमा महिला हिंसा, दलित, मधेसी, पिछडावर्ग र मुस्लिम अधिकार लक्षित कुनै पनि कार्यक्रम नगरी बजेट दुरूपयोग गर्दै आएको बताउदै महिला अधिकारकर्मी र सञ्चारकर्मीले सो को खोजी गर्नुपर्नेमा उनले जोड दिए ।
आफ्ना स्थानीय तहमा भएका बजेट दुरूपयोग तथा आफ्ना अधिकारको खोजी गर्न जिल्लाका सबै स्थानीय तहका उपप्रमुख सचेत हुनु पर्नेमा उनको जोड थियो । सबै स्थानिय तहमा गरिब, बिपन्नका बालबालिकालाई निःशुल्क शिक्षा दिनका लागी कन्या कलेजको अवधारणा लागु गर्नुपर्नेमा उनको जोड थियो । अर्का प्रदेश सदस्य धर्मबहादुर लाल श्रीवास्तबले साना कक्षाका बालबालिकालाई पाठ्यक्रमका नाममा झोलाको भार बोकाउने कार्य पनि हिंसा भएको बताए । “१६ केजीका बालबालिकालाई १० केजीको भार बोकाएर हामीले कस्तो शिक्षा दिन खोजेका छौं । बढि पुस्तकका कारण झोलाको भार भन्दा आवश्यक उपयोगी र सान्दर्भिक पाठ्यक्रम बिकासको आवश्यक छ,” उनले भने । संघिय सरकार, प्रदेश र स्थानीय सरकारमा लैङ्गिक उत्तरदायी बजेट बिनियोजन नभए महिला अधिकारको सुनिश्चितता नहुने प्रदेशसभा सदस्य रिना बिकले बताईन् । महिलाको आर्थिक शसक्तिकरण र किशोरीका लागी जिवन उपयोगी सिप दिन सके हिंसा न्यूनीकरण हुने उनको भनाइ थियो ।
लागू औषध र मदिराको अनियन्त्रित बिक्री बितरणले हिंसालाई बढावा दिएको बताउँदै स्थानीयतहको न्यायिक समितीमा कानुन व्यवसायीको उपलब्धता नभए न्यायिक निरूपण प्रभावकारी नहुने जिल्ला समन्वय समिति प्रमुख नारायण प्रसाद खनालले बताए । लैङ्गिक हिंसा न्यूनीकरणका लागि शिक्षा र सचेतना आवश्यक रहेको जिल्ला समन्वय समिती उपप्रमुख तारावती चौधरीले बताईन । कार्यक्रममा बोल्ने अधिकांस वक्ताले न्यायिक समितीको सक्रियता र तटस्थता बिना हिंसाको घटनामा कमी नआउने बताए । जिल्लाका बिभिन्न स्थानिय तहका उदाहरणीय महिला पुरुषलाई सम्मान गरिएको कार्यक्रम अघि दिवशका अवसरमा तौलिहवामा ¥यालीको आयोजना गरिएको थियो ।