खोज

जिल्लाको मायादेबी गाँउपालिका वडा नम्बर ७ (साबिक हरनामपुर गाबिस) लाई बालविवाह मुक्त वडा घोषणा गरिएको छ ।
मायादेवी गाँउपालिका, सेभ द चिल्ड्रेन र लुम्बिनी एकिकृत बिकास संस्थाको सहयोगमा वडा कार्यालयको आयोजनामा आयोजित कार्यक्रममा तोकिएको सुचक पुरा भए सगै वडालाई बालविवाह मुक्त घोषणा गरिएको हो । वडामा बि.स. २०७१ मा वडामा भएका कुल ६३ वटा विवाहमा २५ वटा विवाह १८ बर्ष मुनी भएको तथ्याङ्क वडा अध्यक्ष जनार्दन प्रसाद चौधरीले जनाए ।
सो पश्चात तत्कालिन गाबिसस्तरीय बाल संरक्षण तथा सम्बर्धन उपसमितीको अगुवाईमा बालविवाह मुक्त वडा घोषणा गर्ने उद्देश्यका साथ सचेतनाका कार्यक्रमलाई निरन्तरता दिईएको उनले बताए । सचेतना प्रवाह सगै बिस २०७२ मा बालविवाहको दर ३६ प्रतिशत, २०७३ मा १९ प्रतिशत, २०७४ मा ७ प्रतिशत र २०७५ मा ४ प्रतिशतमा झरेको चौधरीले जानकारी गराए ।
तोकिएको सुचकहरू पुरा गरेको कारण वडा अध्यक्ष चौधरीले वडालाई बालविवाह मुक्त घोषणा गरि घोषणापत्रमा हस्ताक्षर गरेका थिए । कार्यक्रममा बोल्दै संघिय साँसद अतहर कमालले बालविवाहका कारण बालबािलकाको सर्वाङ्गिण बिकास नै प्रभावित हुने भएकाले सचेतना कार्यलाई निरन्तरता दिनु पर्ने बताए । बिधमान कानुनले समेत २० बर्ष मुनीको विवाहलाई दण्डनिय बनाएको बिषयमा समेत सचेतना प्रवाह आवश्यक रहेकोमा उनको जोड थियो ।
बालविवाहले निम्त्याउने असर बारे समयमै सचेतना प्रवाह गराएर बाल विवाह न्युनिकरणको अभियानलाई थप प्रभावकारी बनाउन सकिने जिल्ला समन्वय समिती उपप्रमुख तारावती चौधरी चौधरीको भनाई थियो । वडा नम्बर ७ ले तोकिएको सुचक पुरा गरि वडालाई बालविवाह मुक्त घोषणा गरे सगै बालविवाह बारेका सचेतना कार्यक्रम सञ्चालन गर्न गाँउपालिकाले प्राथमिकता दिने मायादेवी गाँउपालिकाका अध्यक्ष बजरंगी कुर्मीले बताए ।
उनले अभियानलाई अन्य वडामा समेत बिस्तार गरि गाँउपालिकालाई बालविवाह मुक्त बनाउनका लागी आफूहरू लागी परेको जानकारी दिए । सो अवसरमा अभियानलाई सफल बनाउन सहयोग गरेका समाजसेवी, स्वास्थ्यसेवा प्रदायक, स्वयंसेविका, सहजकर्तालाई सम्मान समेत गरिएको थियो । कार्यक्रममा गाँउपालिका उपप्रमुख गिता तिवारी, प्रमुख प्रशासकिय अधिकृत रामचन्द्र ढकाल लगायतले मन्तब्य दिएका थिए ।