खोज

 जिल्ला वन कार्यालय रुपन्देहीले जिल्लाका उत्कृष्ट नीजि वन धनीहरुलाई सम्मान गरेको छ । आफ्नो नीजि जग्गामा वृक्षारोपण गरी नीजि वनको विकास गर्नुका साथै वातावरणीय सन्तुलन कायम राखी वन पैदावारमा आत्मनिर्भर बन्नमा उल्लेखनीय भुमिका निर्वाह गर्ने नीजि वन धनीहरुलाई सम्मान गरिएको हो ।
विगत ३ वर्ष देखि नेपाल सरकारको वन दशक कार्यक्रम अनुसार रुपन्देहीका उत्कृष्ट वन धनीहरुलाई सम्मान गरिदै आएको जिल्ला वन कार्यालय रुपन्देहीका सहायक वन अधिकृत गिरीराज पन्तले बताए । जिल्ला वन कार्यालय रुपन्देही र नीजि वन सञ्जालले संयुक्त रुपमा मुल्यांकन मार्फत छनौट गरी २१ जनालाई सम्मान गरिएको नीजि वन सञ्जालका अध्यक्ष जगन्नाथ कुर्मिले जानकारी दिए ।
नीजि वन धनीहरुमध्ये १३ जनालाई नगद ८ हजार र ८ जनालाई ६ हजार सहित प्रमाणपत्रले सम्मान गरिएको हो । वृक्षारोपण गरेको जग्गाको क्षेत्रफल, प्राविधिक पक्ष, विरुवाको संरक्षणको अवस्था, व्यवस्थापन जस्ता विषयहरुको मुल्यांकन गरी उनीहरुलाई सम्मान गरिएको जिल्ला वन कार्यालय रुपन्देहीले जनाएको छ । सम्मानित हुनेहरुमा सम्मरीमाई–३ का बब्लु राय, मर्चवारी–१ का मकसुद आलम (तुरुला खाँ), मर्चवारी–३ का सोमइ बरई, मर्चवारी–५ का परमेश्वर जैसवाल, मर्चवारी–२ का मोहम्मद हसन रजा, सम्मरीमाई–५ का कन्हैया माझी, रोहिणी–२ का चन्द्रिका यादव, लुम्बिनी सांस्कृतिक न.पा.–७ का अब्दुल सकुर खाँ, तिलोत्तमा न.पा.–८ का दिपक राज घिमिरे, कञ्चन–४ का डोल बहादुर थापा, पार्वती थापा, सम्मरीमाई–६ का दिपचन्द मुराव, कोटहीमाई–६ का गंगाराम चौधरी, गैडहवा–४ का शिवनाथ जैसवाल, सम्मरीमाई–६ का श्यामसुन्दर गिरी, रोहिणी–२ का उमाशंकर यादव, सियारी–७ का विष्णु न्यौपाने, गैडहवा–१ का अनिस मुसलमान, गैडहवा–२ का रामकुमार वनिया, रोहिणी–३ का रमावती मुराव, सम्मरीमाई–७ का वासुदेव मल्लाह र मायादेवी–७ का दिपचन्द्र बरई रहेका छन ।
सो अवसरमा बौल्दै जिल्ला वन अधिकृत रोमराज लामिछानेले वनको संरक्षण गरे मात्र पर्यावरणीय सन्तुलन कायम हुने बताए । उनले नीजि जग्गामा वृक्षारोपण गर्ने नीजि वनधनीहरुलाई प्रोत्साहन स्वरुप सम्मान गरिएको बताए । त्यस्तै नीजि वन सञ्जाल रुपन्देहीका अध्यक्ष जगनाथ कुर्मीले वृक्षारोपणले वातावरणको संरक्षण हुनुका साथै आम्दानीको स्रोत पनि हुन सक्ने बताए । उनले धेरै भन्दा धेरै वृक्षारोपण गर्नु सरकारको नीति समेत रहेको बताए ।